Han måtte evakuere familien før han gjekk på jobb på sjukehuset - i dag fekk han ros frå kongeparet

– Eg synest det var ei veldig sterk oppleving, og det var eit utruleg sterkt signal å sende til bygda. Dei gav jo inntrykk av at dei er veldig glade i Lærdal og bryr seg om både bygda og innbyggjarane, seier overlege og seksjonsleiar ved Lærdal sjukehus, Tom Nordstrand.

Evakuerte familien først

Natt til søndag måtte han først sørge for å få sin eigen familie i tryggleik før han sette kursen for sjukehuset der han jobba time etter time for å gje helsehjelp og omsorg. Då kongeparet kom til sjukehuset var han ein av dei som fekk fortelje om sine sterke opplevingar.

– Eg skildra litt korleis det var å bli dratt mellom det private og det profesjonelle, der ein skulle ta vare på familie, barn og hus og samstundes had i bakhovudet at ein skulle organisere på sjukehuset. Vi har hus om lag 100 meter frå der brannen starta, og vi frykta jo at vårt hus skulle brenne ned, fortel Nordstrand.

– På eit tidspunkt så tenkte ein det at ok at no får det berre stå til, no må eg berre dra til sjukehuset og sjå kva eg kan gjere der.

Kongen rosa samarbeidet

Kongeparet brukte god tid inne på sjukehuset i dag, og snakka med representantar for alle yrkesgruppene som jobbar på Lærdal sjukehus som er det eldste i Sogn og Fjordane.

– Det andre som slår meg er korleis dei forskjellige etatane og vanlege folk har samarbeidd om å løyse dei utfordringane som oppstod. Dei fekk det beste ut av det, og det er vel ein av grunnane til at det ikkje gjekk menneskeliv. Det er imponerande å høyre om samhaldet som var og framleis er her i Lærdal, sa kong Harald då han og dronninga møtte pressa.

• LES OGSÅ: Huset hans blei skåna under brannen - i dag fekk familien besøk av kongeparet
• LES OGSÅ: Dronninga: – Såg ut som ei krigssone

– Dei var djupt rysta

Overlege og lokalpolitikar Geir Berge Øverland var svært glad for at kongeparet valde å bruke tid på å snakke med alle som var med dei første hektiske timane av brann- og redningsaksjonen.

– Det gjorde veldig stort inntrykk på oss som møtte dei. Kongeparet har jo bakgrunn frå Lærdal, særleg kongen som har vore her mykje. Det var heilt tydeleg at dei var djupt rysta og rørt over det dei hadde sett og opplevd. Det var veldig sterkt for dei, seier Øverland.

Han meiner det er uendeleg viktig for moralen til dei som no skal byggje opp att lokalsamfunnet etter storbrannen på Lærdalsøyri.

Dronninga opna sengeposten

– Dei verka veldig interessert i både sjukehuset og korleis arbeidet var organisert og kva som skjedde. Dei snakka med alle yrkesgrupper her. Dronninga er jo velkjend med sjukehuset, ho var jo her og innvigde sengepostane her i 1973. Noko ho utmerka godt hugsa, fortel overlegen.

Brannmenn, friviljuge, sivilforsvar, heimevern og mange andre bidrog med innsats under og etter brannen som råka 40 bygningar i Lærdal.

Oppe på sjukehuset stod dei tilsette nærast i kø for å jobbe, trass at mange sjølv var direkte og indirekte råka av brannen.

– Heilt avgjerande med sjukehuset

– Eg kom opp på natta, for eg hadde vakt i distriktet. Så når eg hadde fått ut og evakuert familien, så møtte eg her på jobb og visste at her blei det bruk for folk. Eg skjønte jo at det kom inn mange røykskadar, seier jordmor Sigrid Lysne.

Ho meiner som mange andre at det var heilt avgjerande at det framleis er eit sjukehus i Lærdal. Over 400 var innom for å få helsehjelp.

– Det er forferdeleg å tenkje på alle dei som blei råka, det er framleis eit under at ikkje nokon blei alvorleg skada. Det er jo dramatisk, men trass alt kom frå det med livet i behald. Det er ufatteleg.