– Viss fleire og fleire vil køyre forbi sjukehuset sitt, så er grunnlaget for å vidareutvikle det svekka. Det uroar meg sjølvsagt, seier direktør i Helse Førde, Jon Bolstad.
Dei fire Nordfjord-kommunane Selje, Vågsøy, Stryn og Hornindal er i forhandlingar om samanslåing med kommunar på Sunnmøre. Difor har dei bede helseføretaket om å undersøkje kva konsekvensane blir av ein eventuell overgang til Helse Møre og Romsdal. Biletet som vert teikna av Helse Førde syner risiko for kutt og store vanskar med å halde på dagens tilbod.
- Les også:
- Les også:
– Om folk sluttar å gå til nevrolog der, ikkje vil bruke øyre-, nase-, halstilbodet eller ta MR og røntgen der, så vil det få konsekvensar for volumet og drifta. Det seier seg sjølv at vi ikkje kan ha kostbare tenester som ikkje er i bruk, understrekar Bolstad.
Friarane ser farane
Tilbodet ved Nordfjord sjukehus er dimensjonert etter kor mange innbyggjarar som høyrer til helseføretaket. I Selje er ordføraren klar over at ein storkommune som høyrer til nabofylket kan få store følgjer.
– Vi ser heilt tydeleg faren med at det tilbodet blir bygt ned, eller i verste fall lagt ned viss vi skiftar helseføretaksgrense. Vi ser det som utfordrande å kople oss mot St. Olavs i Trondheim kontra Haukeland i Bergen. Eg trur det er best å framleis vere under Helse Førde, seier Stein Robert Osdal (KrF).
- Les også:
Av innbyggjarane i Nordfjord er det flest stryningar som nyttar tenestene ved Volda sjukehus mest. Sett i høve folketalet er honndølene dei ivrigaste brukerane av sjukehuset på Sunnmøre. Likevel vil ikkje høgreordførar Sven Flo, i Stryn, byte helseføretak, sjølv om kommunen hans går inn i eit nytt fylke med eit anna helseføretak.
– Nei, vi har ikkje sagt at det nødvendigvis er det vi ynskjer eller skal ende opp i. Eg trur det løyser seg i forlenginga av regionreforma, seier Flo.
Ventar på avklaring
For samstundes som kommunane er oppmoda om å slå seg saman med ein eller fleire naboar, er det også ei stor regionreform på trappene. Får regjeringa det som dei ynskjer kan landet gå frå dagens 19 fylke til ti regionar. Flo trur Nordfjord og Sunnmøre i framtida vil vere i ein felles region.
– Eg trur, og er overbevist om at med dei tilboda som er på Nordfjordeid og i Volda, så vil dei to sjukehusa utfylle kvarandre i framtida.
I dag følgjer Helse Førde sitt område fylkesgrensa, men det er ikkje sikkert grensene for helseføretaka må samanfalle med fylkesgrensene i framtida. Helse- og omsorgsdepartementet har saka på sitt bord.
– Å gjere endringar for noko som eg opplever fungerer godt, og vi har til hensikt å utvikle vidare, det syns eg er litt trist, seier Jon Bolstad.