Gjekk på trynet, øydela våpenet og fekk ein saftig blåveis

Det gjekk hardt for seg på isete løyper då Håvard Gutubø Bogetveit vart beste norske under torsagens IBU-renn i Tyskland.

Håvard Gutubø Bogetveit med blåveis

FULLFØRTE: Håvard Gutubø Bogetveit var eit fall frå pallplassering under dagens IBU-renn i tyske Arber. Med fjerdeplass vart han best av dei seks norske skiskyttarane.

Foto: Vegard Bitnes

Med 4. plass er skiskyttaren frå Førde likevel strålande nøgd med rennet i Arber.

– Det vart eit spesielt renn, men med fallet på første runde i tankane er eg veldig nøgd med å gå så fort og skyte så pass bra, seier Håvard Gutubø Bogetveit.

Saftig blåveis

Håvard Gutubø Bogetveit

KUL: Håvard Gutubø Bogetveit fekk ein kraftig blåveis etter fallet i Arber.

Foto: Privat

25-åringen fortel om ei isete løype for skiskyttarane som i dag gjekk 20 kilometer under IBU-cupen i tyske Arber.

Ein sving, litt for høg fart og innerski viste seg å bli ein dårleg kombinasjon for førdianaren. Resultatet vart øydelagt gevær og ein saftig blåveis.

– Då eg slo hovudet i isen fekk eg ein skikkeleg kul under auget eg siktar med. Kulen vart berre større og større under konkurransen, så det var berre så vidt eg klarte å sjå gjennom siktet på siste serien, fortel han.

Øydela våpenet

Våpenet til Håvard Gutubø Bogetveit vart øydelagt i Arber.

ØYDELAGT: Kolbekappa vart øydelagt i fallet.

Foto: Privat

I tillegg sprakk stokken på våpenet, medan kolbekappa knakk. Før første skyting måtte han også tømme siktet for snø.

Om ikkje det var nok, fekk bereselen seg ein smell i fallet. Med våpenet nærast slengande bak seg fullførte Bogetveit rennet og kom i mål 2,9 sekund frå pallplass. På standplass vart det med ein bom. Utan fall kunne han fort hamna på pallen.

– Det gjekk med nokre sekund i fallet og nokre sekund på å få orden på våpenet. Eg tapte i alle fall 30 sekund, seier han og legg til.

– Det var annleis å skyte utan den bakarste dele på våpenet, men artig å handtere det.

Pallen under IBU-rennet i Arber

NESTEN: Franske Jean Guillaume Beatrix, russiske Petr Paschenko og Vladimir Tsjepelin frå Hviterussland tok pallplassane. Gutubø Bogetveit vart nummer fire, 34 sekund bak andreplassen.

Foto: Vegard Bitnes

Håpar på EM-plass

Håvard Gutubø Bogetveit

NØGD: Det gjekk hardt utover både Håvard Gutubø Bogetveit og våpenet hans under dagens IBU-renn i Arber.

Foto: Vegard Bitnes

Og dramatikken var ikkje over med målpasseringa. Bogetveit hadde magasinet i då han blåste vekk snøen frå siktet. Det er ikkje lov.

– Det same skjedde med Sjipulin i verdscupen, og då valde dei å ikkje diske han. Difor ville dei heller ikkje diske meg, seier han.

– Kva betyr 4.-plassen for sprinten i helga og resten av sesongen?

Våpenet til Håvard Gutubø Bogetveit etter fallet

SPREKK: Våpenet til Håvard Gutubø Bogetveit fekk ein sprekk i fallet.

Foto: Privat

– Det gir meg ei forvissing om at eg skyt bra og går fort. Så ligg eg veldig godt an til å bli teken ut til EM om to veker.

Men før både EM i italienske Ridnaun og helgas sprint for dei nest beste skiskyttarane i Europa, må våpenet reparerast og hevelsen under auget dempast.

– No skal vi prøve å få limt saman våpenet så det blir klart til laurdag. Det er eg ikkje uroa for. Då er det verre med blåveisen, ler han.