Skipet vart døypt i Southampton 10. mars i år. Det fekk namnet «Britannia», og gudmora var ingen ringare enn dronning Elizabeth II. No er skipet frå P&O Cruises ute på sitt første tokt.
Når det kjem til Flåm den 29. april kjem det til å vise godt att i den smale fjordarmen. Skipet er 330 meter langt, det har 15 passasjerdekk, og det er lugarplass til 4324 menneske.
Mannskapet tel 1398 personar, og skipet har ein tonnasje på 141.250. Dermed blir «Britannia» det største som kjem til Flåm i år, målt i tonnasje.
Men seinare kjem eit skip som er lengre, "Msc Splendida" er 333,3 meter langt. Og i fjor var «Independence of the Seas» med ei lengde på 339 meter i Flåm.
Folksamt i Flåm den 29. april
Den 29. april bør dei sogningane som ikkje likar for mykje trengsel halde seg langt unna Flåm, for i tillegg til «Britannia» kjem det eit mindre skip med plass til 906 passasjerar. Med andre ord kan det vandre godt over 5000 menneske rundt i Flåm denne dagen, dersom begge skipa er fullbooka, og alle tek seg ein tur i land.
Årets cruisesesong er alt godt i gang i Flåm, den blir avslutta den 22. september. Då har det vore i alt 132 anløp med til saman rundt 180.000 cruisepassasjerar innom.
- Les også:
- Les også:
- Les også: