– Desse jakkene har aldri vore ute for sal. Det var frivillige, regjering, kongelege og besøkjande som fekk desse jakkene, seier Odd Arne Mulelid.
Det som var att av dei karakteristiske jakkene frå dei legendariske leikane i Lillehammer i 1994 hamna til slutt på eit lager. Det låg att fleire hundre jakker som ikkje hadde blitt delt ut, og i fleire år støva dei ned utan noko funksjon.
– Men etter ein stor og betre middag, så tok eg og kjøpte heile greia. Og no har eg hatt moro med det i 20 år, seier Mulelid.
Sel litt jakker heile tida
Han forklarer at det var gjennom forretningskontaktar han fekk greie på at jakkesamlinga kanskje var til sals. Først takka han nei til tilbodet om å kjøpe jakkene, men han skifta altså meining etter kvart.
– Og det har eg aldri angra på.
Mulelid seier nemleg at salet har gått jamt og trutt sidan nittitalet, og at han framleis sel jakker.
– Berre denne veka har eg selt sju jakker. Så det går jamt og trutt, ja. Det er jo nesten litt trasig at det Byrjar å minke. Eg skal i alle fall ha ei hengande att til minne om heile greia.
Likevel seier han at han har nokre jakker hengande, så for dei som har lyst til å sikre seg eit eksempel, er det mogleg å gripe sjansen.