Det er svært utfordrande å få kontroll på dei mange skogbrannane i Sverige, og brannmannskap frå fleire land hjelper til sløkkearbeidet. Det er no 17 skogbrannar og tre grasbrannar, opplyste innanriksminister Morgan Johansson på ein pressekonferanse, ifølgje SVT.
Øystein Skovro jobbar i Nord Helikopter og er hyra inn for eit anna selskap som mangla folk. Helikopterpiloten er no stasjonert på ein flyplass i Herjedalen. Det har vore ei spesiell oppleving å sjå området frå lufta.
– Det er store område som er heilt svartsvidde. Det er mykje mose som er brent vekk, så mykje stein har kome fram. Dermed ser det ut som eit månelandskap.
Fryktar nye brannar
Dei siste dagane har det ikkje vore dei store brannane i dette området, men Skovro og dei andre driv mykje med ettersløkking.
– Det ulmar i mose, gras og skogbotn. Temperaturen skal auke, så dei fryktar at det vil ta seg opp dei neste dagane.
Helikopteret han flyg kan ta 1500 liter i kvar vassbøtte. Vatnet blir henta opp frå tjern eller innsjøar i området og enkelte plassar har 200 vassbøter blitt dumpa på den same plassen.
– Varmt
Mannskap frå fleire land deltek i kampen mot skogbrannane, under krevjande forhold. Søndag måtte fleire brannfolk reddast ut av eit område i Dalarna etter at dei blei omringa av brann. Skovro seier tryggleiken er i fokus.
– Vi må passe på at det er trygt for oss i lufta, men også for dei på bakken. Vi prøver å tenkje kor brannen kan flytte seg i forhold til folk og hus. Det er mykje folk på bakken, og vi må passe på kor vi slepp vatnet ned slik at vi ikkje treff nokon.
Det mest utfordrande har vore varmen, både for dei på bakken og dei i lufta.
– Det er som å sitje i ein bil med motorsykkelhjelm, utan air condition og med 30 varmegrader ute. Og når vi sit der fleire timar i strekk, er det dette vi må vere mest merksame på.
Sett pris på
Tysdag føremiddag sit han på basen og ventar på å bli kalla ut.
– Vi har beredskapsvakt for å hjelpe til om det skulle blusse opp. Det skiftar heile tida, frå å vere roleg til at det ein time seinare er ragnarok og null kontroll.
Førebels er det uvisst når han kan reise tilbake til Noreg.
– Vi tek ein dag om gongen. Vi får bidra på ein heilt annan måte enn i kvardagen, og alle set stor pris på det vi gjer.
- Les også:
- Les også: