Kjell (80) vann som han ville – igjen

– Det er berre å stå på og ikkje gi seg, seier medaljegrossisten frå Jølster.

12 gullmedaljar

Kjell Steinset var ein av fleire lokale friidrettsveteranar som i helga kjempa om edelt metall og heider og ære under Veteran-NM i friidrett.

Meisterskapen i Knarvik resulterte i 29 medaljar. Av desse 12 gull, der Bjørg Reknes (Florø) og nemnde Steinset tok fire kvar.

– Det gjekk greitt. Eg sprang 400 meter før i dag, så det var berre å bruke siste rest av kreftene, seier 80-åringen etter å ha fullført 1.500 meter på tida 7,00,96.

Steinset er ikkje noko ukjent namn i friidrettsmiljøet. Han har siste åra sett fleire norske rekordar. Det vart ikkje nye rekordar i helga. Nærast var han på 400 og 800 meter.

Steinset er også dobbelt europameister og firedobbel nordisk meister.

• Les også: Her knuser Kjell (79) norgesrekorden på 1.500 m med 47 sekund
• Les også: Kjell (80) har alle norske løpsrekordar frå 400 til 5.000 meter

– Det er litt genar. Så har eg nok halde meg i betre form enn dei fleste gjennom jamn trening. Eg prøver å trene fire gonger for veka, smiler den ferske firedoble norske meisteren.