– Vi er skuffa, men vi må ta omsyn til at departementet ønsker meir informasjon, seier Vågsøy-ordførar Kristin Maurstad.
Flora og Vågsøy meinte dei hadde komme fram til ei god løysing då begge kommunane vedtok å slå seg saman. Men med søknaden på bordet kom beskjeden frå Kommunal- og moderniseringsdepartementet om at dei ønsker meir utgreiing før Kinn kommune kan bli ein realitet.
- Les også: Vil ikkje seie ja til denne kommunen.
- Les også: Kan bli einaste kommunen med delt kommunesenter.
Held korta tett til brystet
Dei to ordførarane, Kristin Maurstad og Ola Teigen, møtte på Stortinget for å legge fram vedtaka og framtidsplanane sine. Etter å ha møtt både statssekretær i Kommunaldepartementet, fleirtalskonstellasjonen på Stortinget og Helga Pedersen i kommunalkomiteen, var dei ikkje blitt klokare på kva avgjerda kom til å bli.
– Dei held korta tett til brystet, men vi opplevde at vi blei lytta til, og det blir spennande å sjå kva som kjem ut av det, seier Maurstad.
Arbeidarpartiet sin talsperson i kommunalkomiteen, Helga Pedersen, har forståing for at Kinn-ordførarane er utolmodige etter å få eit endeleg svar.
FORSTÅR: Helga Pedersen (Ap) har forståing for at ordførarane er utolmodige etter svar.
Foto: Marte Lindi, NRK– Eg forstår at dei blir frustrerte over dei ulike signala frå regjeringa. Når det ligg ein søknad på bordet bør det vere mogleg å ta stilling til det, seier Pedersen.
Kommunalkomiteen skal legge fram si innstilling 1. juni, og saka blir behandla 8. juni. Fylkesmannen i Sogn og Fjordane skal gjere dei utgreiingane departementet ønsker innan 1. september.
– Ikkje fånyttes
Maurstad seier dei har jobba hardt for det dei har trudd på og har brukt mykje tid og ressursar på å få til ein avtale med Flora. Men ho trur ikkje arbeidet er heilt bortkasta om dei ikkje får slå seg saman.
– Vi har peika oss ut ei retning, og dei to kommunane har komme tettare. Vi ser uansett konturane av eit framtidig samarbeid om å styrke kysten, seier ho.
Ho legg ikkje skjul på at dei økonomiske gevinstane av å slå seg saman har vore ein viktig faktor, spesielt for Vågsøy.
– Om vi ikkje får slå oss saman, og likevel blir straffa økonomisk, vil det få store konsekvensar for Vågsøy, seier Maurstad.
Vi har ikkje lukkast å få tak i departementet for kommentar.
