Silje Torvanger, Stine Hovland og Eli Anne Dvergsdal var inntil nylig sjølv ein del av stammen i kvinnefotballmiljøet på Kaupanger. Men i kveld synte dei ingen nåde mot gamle lagvenninner då dei kom heim att med sitt nye lag, Sandviken i Bergen.
Etter full tid stod det 0-7 i målprotokollen, og Kaupanger-trenar Per Arne Verlo måtte innsjå at det var lite å gjere mot eit langt sterkare bortelag.
– Vi blir nokre hakk for små sånn etterkvart. Det startar jo på verst mogleg måte med eit dødballmål i mot før det har gått eit minutt. Vi gjorde det ikkje lett for oss sjølve. Så bestemte vi oss etter ein halvtime for å leggje oss bak for å nekte dei rom. Då spelar vi ein lang periode uten å sleppe inn mål, så glipper det litt etterkvart, sa Verlo til NRK etter cupkampen.
Han innrømmer lett at det slett ikkje er noko god framsyning frå Kaupanger-damen si side, men legg også vekt på at dei møtte sterk motstand, ikkje minst frå dei tidlegare Kaupanger-spelarane.
– Vi klarer ikkje å følgje dei eller stå imot dei. Det dei driv på med er eigentleg toppserienivå. Vi blei duellert ut av kampen og sprunge frå i periodar, seier Verlo.