Karadas ute i to til tre veker

– Azar har fått konstatert brot i kinnbeinet. Det er ikkje noko stor dramatikk, men det lønner seg å stabilisere brotet og vi ventar no ein operasjon, seier medisinsk leiar Andreas Foss i Sogndal Fotball til NRK.no måndag.

Det var under kampen mot Sarpsborg 08 søndag kveld at Azar Karadas fekk seg ein real smell i starten av andre omgang. Eidaren måtte tole tøffe duellar med gjestane sine spissar Aaron Samuel og Frank Dja Djedje, og det enda til slutt på sjukehus.

• LES OGSÅ: Ulrik satsar på 2012-reprise
• LES OGSÅ: Uavgjort etter sjokkstart for Sogndal - Flo-perle sikra poenget

Håpar han er tilbake om nokre veker

Karadas måtte forlate bana med bomullsdottar i nasen og tydelege spor i ansiktet etter samanstøyten. Han var raskt frakta til Førde sentralsjukehus der han no får behandling.

– Det vil gå to til tre veker før skaden har grodd, og det har blitt så stabilt at han kan kome tilbake i spel. Det er iallfall håpet, seier medisinsk leiar Andreas Foss.

Det er førebels ikkje noko som tyder på at forsvarskjempa har fått hjerneristing i tillegg.

– Men behandling for hjerneristing er ro og kvile, noko han får no uansett, så det skal gå greitt, seier Foss.

– Kor alvorleg er det at han må operere?

– Det er ikkje noko alvorleg med tanke på at om dette var ein normal pasient så kunne ein valt å ikkje operere. Men på grunn av jobbsituasjonen hans er det å anbefale i dette tilfellet.

– Han har smerter

Foss seier Karadas truleg kan bli sett i aktivitet i løpet av neste veke, men han blir ikkje å sjå på kamp med det første. Eidaren er svært viktig for Sogndal i forsvarsrekkja og er venta ute minst to kampar.

– Han kan trene i mellomtida, og håpet er at han er fullt klar igjen til kamp etter to til tre veker.

– Kva seier Azar sjølv om skaden?

– Han har smerter, men elles er han i god form. Han er inneforstått med vidare plan for behandling, og ønskjer sjølv å kome seg fortast mogleg tilbake på fotballbana for å bidra, seier Foss til NRK.no.

Fire i forsvarsrekkja er ute med skade

Men Azar Karadas er ikkje den einaste i forsvarsrekkja til Sogndal som nett no er ute med skade. Hannu Patronen, Bjørn Inge Utvik og Eirik Bergum Skaasheim er i same situasjon.

Patronen vart skadd under trening på fredag.

– Han har blitt behandla for hjerneristing etter ein hovudduell på trening. Han har vore litt groggy, men er på betringas veg. Han er litt usikker i forhold til komande kamp, men bør kome seg til neste veke, seier medisinsk leiar Andreas Foss.

Bjørn Inge Utvik har beinhinnebetennelse og var i delvis trening sist veke, og Foss reknar med det blir det same denne veka.

– Han kjenner seg fin og har ikkje meir smerter etter trening, så det vil seie at vi håpar han er klar til kamp i helga, seier Foss.

Under kampen mot Sarpsborg 08 i går måtte også Eirik Bergum Skaasheim ut med skade. Han fekk seg ein strekk like før pause.

– Han gjekk såpass bra etter kampen i går, og det er eit positivt teikn. Det er uvisst om han rekk kampen i helga, men han skal til nokre vidare undersøkingar. Vi håpar han er klar i løpet av neste veke.