Stian Grimseth står sjølv i spissen for meisterskapen som Tambarskjelvar skal arrangere i Naustdal 2. – 8. mai 2016.
På veg til Israel og møte med det europeiske forbundet, fekk den tidlegare vektløftaren gladmeldinga han hadde håpa på.
– 1,1 millionar kroner er veldig bra, og vi er nøgde og glade for det. No skal vi jobbe iherdig med å få på plass det resterande beløpet, seier han til NRK.no.
Åtte mot ei røyst
Heile arrangementet har ei kostnadsramme på vel sju millionar kroner, og vil samle 550 deltakarar frå 34 land. I tillegg har dei fått eit konkret tilbod om direktesending både i Norge og Europa.
Kostnadsbiten her er ein halv million kroner høgare enn dei først rekna med. Også Naustdal og Førde kommunar har sagt seg villige til å spleise på TV-avtalen, utan å vedta noko beløp.
- LES OGSÅ: Har allereie imponert Visepresidenten
Arrangørane søkte fylkeskommunen om 1,5 millionar kroner i støtte, men fekk 1,1 millionar kroner.
– Det er ein føresetnad at arrangørkommunane og næringslivet yter tilskot til TV-produksjonen, seier fylkespolitikarane som vedtok løyvinga med åtte mot ei røyst.
– No kjem vi i land
Fylkesutvalet legg også til at arrangøren ikkje kan rekne med anna fylkeskommunal støtte til investeringar i samband med arrangementet. Dei legg også til grunn at fylkeskommunal logo eller namn får ei merksemd som står i rimeleg forhold til den støtta som blir gjeven.
Den endelege løyvinga blir teken stilling til i budsjettet for 2015 og eventuelt 2016. Tilrådinga frå fylkesrådmannen var på ein halv million kroner.
– Med ei slik draghjelp skal vi klare å komme i land. Det er viktig å ha så god støtte frå fylket og fylkespolitikken, seier Grimseth.