Kulturskulen må spare 248.000 kroner, og for å klare det har dei sendt oppseiingsvarsel til korspdirigentane i byen. Det kan bety at byen blir utan hornmusikk i 17. mai-toget.
– Det er ei forferdeleg oppgåve å måtte gå til dette skrittet. Men eg ser ingen andre moglegheiter, seier kulturskulerektor Arne Sunnarvik til Firdaposten.
– Vil ikkje ofre den finaste fridagen
Kulturskulerektoren vil heller kutte dirigentstillingane enn å måtte kutte i dei faste stillingane. Grunnen til det er at dirigentane er på eksterne kontrakter.
Dei tre korpsa i byen - Floraskulen Brass Band, Florø Skoles Musikkorps og Florø Hornmusikk - blir difor dei store taparane. Dirigentane har allereie fått oppseiingsvarsel.
Dirigent Hans Erik Stenseth i Floraskulen Brass Band utelukkar ikkje at både dei og dei to andre korpsa kjem til å droppe nasjonaldagen, i rein protest.
– Vi vil ikkje ofre den finaste fridagen i året, for kommunen, når vi ikkje får noko hjelp og støtte attende. Slik som det ser ut i dag er min periode som dirigent over i april, seier Stenseth til NRK.no.
Ordføraren kan ikkje love pengar
Ordførar likar ikkje det ho leste i Firdaposten i idag, men ho kan likevel ikkje love meir pengar til kulturskulen.
– Vi kan ikkje seie at kulturskulen ikkje skal skjere ned, for då må vi jo kutte hos andre. Saka ligg på rådmannen sitt bord. Det er det eg kan seie i dag, seier ordførar Bente Frøyen Steindal (Ap) i Flora kommune til NRK.no.