Spørsmåla i quizen er ei lett blanding, der storparten av det er knytt til Sogn og Fjordane, kommunane i fylket og personar som har tilknyting til fjella og fjordane våre.
Finn fram penn og papir og du er klar. Noter ned den første bokstaven i svaret ditt, og alle bokstavane blir til dagens løysingsord. Det sender du inn i svarboksen som du finn nedst på denne sida.
Vi plukkar ut ein vinnar kvar dag. Den heldige får ein NRK-sekk med litt godis i posten. Av alle dei som sender inn rett svar i løpet av jula og romjula, plukkar vi ut ein vinnar som får ein DAB-radio.
Her er dagens quiz:
- Vinnaren av årets Stjernekamp, Adam Douglas, har eit nært forhold til Bremanger. Kvar i kommunen spelte han sin første konsert i Norge?
- Kva heiter ministeren som fekk skikkeleg kjeft då han i mai i år besøkte Balestrand? Vi vil ha førenamnet.
- Fotballspelaren frå Kaupanger fekk leddgikt som 18-åring. Etter å ha skåra 28 mål denne sesongen er han blitt historisk, som den spelaren som har skåra flest mål i ein sesong i 1. divisjon gjennom tidene. Kva heiter spelaren? Vi vil ha det siste etternamnet.
- Fleire kommunar i fylket fekk problem då selskapet som stod for bostømminga gjekk konkurs. Kva heiter selskapet?
- Askvoll fekk to representantar på Stortinget etter valet i haust. Kor mange år skilnad er det mellom dei to representantane? Skriv svaret med bokstavar.
- Over 2000 personar har i år overnatta i den nye turisthytta på Skåla i Loen. Kva heiter arkitekten bak Skålabu? Vi vil ha førenamnet.
- Kor mange vidaregåande skular er det i Sogn og Fjordane? Skriv svaret med bokstavar.
- Sveinung Rotevatn mista plassen sin på Stortinget etter valet i haust. Frå nyttår har han fått ny jobb i Oslo – som kva?
- Kva parti har ordføraren i kommunen som Eid skal slå seg saman med?
- Kva heiter jølstringen som er attvald som generalsekretær i Senterpartiet? Vi vil ha førenamnet.
Fristen for å sende inn rett svar er ved midnatt same dag som quizen er lagt ut.
Om du ikkje får skjemaet til å fungere kan du sende løysingsordet saman med namn og adresse til konkurranse.sfj@nrk.no
Lykke til!