– På ein skala frå éin til ti? Elleve! Dette er heilt fantastisk. Eg heldt på å ta med meg hakke og spade for å starte på jobben på morgonkvisten i dag, ler Sven Flo.
Stryn-ordføraren var med då samferdsleminister Ketil Solvik-Olsen (Frp) søndag vitja området og sleppte nyhenda om vegval for framtidig veg opp Strynefjellet:
Regjeringa vil byggje ny tunnel på om lag 16,6 kilometer frå Skåre til Breidalen. I tillegg vil dei leggje til rette for å byggje arm til Geiranger.
– Det er heilt fantastisk. Prosessen har vore utruleg lang. Vi har jobba mykje med dette og hatt tallause rundar til Oslo med alt som kan krype og gå av interesseorganisasjonar, seier Flo.
- Les også:
Meiner vedtaket er optimalt for regionen
Vedtaket betyr at Riksveg 15 over Strynefjellet har komme i posisjon til å komme inn på Nasjonal Transportplan (NTP).
– No er avgjerda teke om kva vegløysing vi skal ha. Statens vegvesen får i oppdrag å arbeide vidare med planane. I mellomtida må politikarane, både lokalt og på Stortinget, stå for naudsynte pengeløyvingar. Prioriteringane i NTP avgjer når vegen faktisk vert bygd, seier samferdsleminister Ketil Solvik-Olsen til Fjordingen.
Han meiner det såkalla B1-alternativet gir raskare reisetid, tryggare veg og ei god løysing for næringslivet i området. Det er ordføraren i Stryn samd i.
– Det er dette alternativet vi har sett for oss som det beste. Det blir ikkje så bratt, vegen går ikkje ute i dagen og det blir fleire felt i tunnelen. Det gir ein sikrare tunnel og tek bort ein del av skredproblema. Dessutan gir arm til Geiranger moglegheiter for turistnæringane. Dette er optimalt, seier Flo.
Trur på posisjon allereie i neste NTP
Neste revisjon av Nasjonal Transportplan skal opp i Stortinget i 2021. Flo håpar på byggjestart innan 2022.
– Det vil ta tid. Først må vi no komme inn i NTP, og vi må jobbe med Stortinget for å få pengar. Så no skal det skje mykje politisk framover. Men eg er optimist og trur vi kan komme i posisjon allereie i neste NTP-periode, seier ordføraren.