Talsmannen til foreininga meiner Jon Bolstad og leiinga i Helse Førde no vert utsette for ein hetsekampanje.
Rune Larsen i foreinga seier det er oppsiktsvekkjande at Dagbladet let dotra til ein sentral sjukehusaksjonist i Lærdal skrive om saka.
- Ein kan spørje seg om det er andre motiv som ligg bak når journalisten skriv så einsidig negativt om Helse Førde, seier Larsen.
- Kven er kjeldene?
- Ein kan jo lure om det er bindingar, kven som er kjeldene til informasjonen og om det er eit ønskje om å lage bråk med utgangspunkt i sjukehuset i Lærdal, seier Larsen.
Dagbladet-journalist Ragnhild Avdem Fretland er frå Lærdal og har den siste tida skrive kritiske saker om leiinga og styret i Helse Førde. Mora heiter Anna Avdem og har fleire gonger aksjonert mot prioriteringane som styret i helseføretaket har gjort. No er Avdem, ifølge Sogn regionråd, også nominert av Lærdal kommune til ein plass i det nye styret som skal veljast i mai.
- Politiske motiv?
Det er dette Rune Larsen i legeforeininga reagerer så kraftig på.
- Vi kan jo lure på om det ligg ein tanke bak - at det er så viktig å lage bråk om tilhøva rundt sjukehuset i Lærdal at det i neste omgang difor er naturleg å få valt inn eit styremedlem frå Lærdal.
- Er det ikkje reelle problemstillingar som vert tatt opp i artiklane? Møbelkjøpet til direktøren var kanskje ikkje det luraste?
- Nei, det var det sikkert ikkje det luraste. Men om saka fortener førstesida på Dagbladet og mange dagar med følgjetongar i fleire media, det stiller eg spørsmål ved. Difor lurer eg på om det er andre motiv som ligg bak.
Ler bort kritikken
Dagbladet-redaktør Thor Gjermund Eriksen forstår rett og slett ikkje kritikken frå legeforeninga, og seier han har full tillit til journalist Ragnhild Avdem Fretland.
- Eg veit ikkje om eg skal le eller grine, ler Eriksen.
- Men kan det ikkje verte eit problem for Dagbladet når dotter til ei av dei som lenge har kritisert Helse Førde-leiinga skriv desse artiklane?
- Eg trur dei fleste vil skjøne at ein journalist som jobbar for Dagbladet gjer det utfrå ein journalistisk integritet og profesjonalitet.
Aksjonist avviser kritikken
- Det ville vore klokt av legeforeninga å møte kritisk journalistikk på ein meir ryddig måte enn denne usaklege mistenkeleggjeringa. Påstandane er dessutan totalt skivebom, meiner Bente Øien Hauge i aksjonen "Forsvar Lærdal sjukehus".
I ei pressemelding frå Øien Hauge peikar ho på at mora til Dagbladet-journalisten, Anna Jorunn Avdem, ikkje er tilknytta sjukehusaksjonen utover den kontakten ho som varaordførar naturleg har med aksjonen.
- Etter det vi har registrert, har Avdem samanfallande synspunkt med dei andre ordførarane og varaordførarane i regionen, påstår Øien Hauge.
Øien Hauge avviser også at sjukehusaksjonen i Lærdal står bak ein kampanje mot Jon Bolstad.
- Mykje av det som er kome fram i media har vore nytt også for oss, heiter det i pressemeldinga.