Det var stor spenning og god stemning i Førdehuset då Førde for første gong inviterte til 2.-divisjonskamp på heimebane. Motstandar Jotun har langt meir erfaring frå høgare nivå, men må i år ta til takke med 2. divisjonsspel.
Dette var og ein spesiell kamp for Førdetrenar Øyvind Indrebø. Han har nemleg lang erfaring som trenar for motstandar Jotun.
– Det var ein skuffande prestasjon frå vår side, spesielt framover. Det er surt å tape når eg veit at vi kan betre, seier førdetrenaren. Han vedgår at det var litt spesielt å møte gamlelaget i første serierunde.
Det vart ein svært så jamstelt kamp, der begge lag låg i føringa. I sluttminutta var det stor dramatikk, men Jotun vann med minst mogleg margin og kampen enda 22–23.
Jotuntrenar, Olafur A Sveinsson, var langt meir nøgd etter kampslutt. Han meiner Jotun var det klart beste laget.
– Vi hadde gode sjansar og då vi låg under etter første omgang, spelte vi på erfaring og taktikk, seier Sveinsson.
Trenaren har ei klar målsetning om å vinne kvar kamp. Han håpar på opprykk, men trur det er ein fire-fem andre lag som også kan gjere det bra. Allereie neste helg er det ny runde i 2. divisjon.
