I heile fylket er mange små grender og bygder framleis råka av etterverknadane etter uveret.
– Det ser betre ut enn i går, men for dei som er utan straum på tredje døgnet, er det ei fattig trøyst å høyre at andre har fått att straumen, seier informasjonsansvarleg i Sognekraft, Tor Yttri, til NRK.
- LES OGSÅ:
Vurderer båtrute
Nærare 300 kundar i Sognekraft sitt dekningsområde er framleis utan straum. Mellom anna i bygda Fresvik, heilt aust i Vik kommune.
– Fresvik bygdeheimi får straum frå aggregat, men det er klart at det er tungt for dei som har vore utan straum i fleire dagar, seier ordførar i Vik, Marta Finden Halset.
Også vestover i kommunen er fleire mindre grender straumlause, mellom anna i Framfjorden. Der har og store deler av fylkesvegen rasa ut.
– Vi vil vurdere no klokka 10 om vi skal setje inn båtrute for dei om lag 200 som bur langs fjorden vestover, opplyser ordføraren.
- LES OGSÅ: |
Stor innsats
I Luster kommune er framleis kring 150 husstandar i bygdene Veitastrond, Leirdalen, Kroken og Sørheim utan straum, men Luster Energi har alt mannskap ute no i morgontimane.
– Vi jobbar hardt for å få inn att flest mogleg av kundane i dag, fortel e-verksjef Anders Molland.
Brebygda Fjærland var lenge utan straum, men takka vere stor dugnadsinnats er dei aller fleste der no inne att på straumnettet.
– Og det var mykje takka vere ein fantastisk innsats av bygdelaget i Fjærland som saman med våre folk var ute og fekk ordna opp. Der var det ei stund heilt vilt, seier Yttri, som rosar bygdelaget si innsats.
Mange stader
I Sogn og Fjordane Energi (SFE) sitt dekningsområde er situasjonen i ferd med å stabilisera seg, men også her er mange mindre bygder framleis utan straum.
– Vi jobbar på spreng med alle styrkar for å få opp nettet. Vi prioriterer hovudforsyningane og høgspenningsnettet og alternative forsyningsveiar. Parallelt jobbar ein med å få opp lågspenningsnettet og forsyningar ut i enkeltområder, opplyser Ole-Bent Søreide i SFE.
Kring 1500 abbonentar i SFE, og totalt i Sogn og Fjordane er over 2000 straumkundar framleis straumlause.
Sunnfjord Energi melder at høgspentnettet i forsyningsområdet no er intakt, og at dei fleste kundane har straumen tilbake. Kraftselskapet har logga alle meldingar om feil, og jobbar no systematisk med å rette feil på lågspentnettet.
Dersom nokon fortsatt er straumlause og ikkje har vore i kontakt med Sunnfjord Energi etter morgonen 2. juledag ber energiverket desse ta kontakt på telefon.
– Nokre av feila har blitt retta midlertidig for å gi abonnentane straumen raskt tilbake, og ein må difor rekne med at etterarbeidet i tida framover vil kunne medføre utkoplingar i nettet i kortare periodar, melder Sunnfjord Energi.
Oversikt over straumlause område:
Sognekraft:
- Vik: Fresvik, Framfjorden, Strendene
Luster Energi:
- Luster: Veitastrond, Kroken, Sørheim, Leirdalen
Sogn og Fjordane Energi:
- Gloppen: Delar av Kandalen, Myklebustdalen, Ytre Fjellbygda og Hyestranda ligg ute.
- Askvoll: Enkeltståande lågspentfeil gjenstår
- Naustdal: Småkrinsar utan straum, området Hjøringebø/Ålesundet er utan straum.
- Bremanger: Strekninga Bortne settefisk – Tunnelinnslag. Settefiskanlegg og tunneldrift ligg ute, samt avgreininga til Elde. Enkelte lågspentfeil hovudsakleg i Davik og Ålfotenområdet
- Flora: Tre trafokretsar ligg ute på strekninga Hovdetre - Hovdevåg. På strekninga Osstrupen - Svardalasosen ligg ein trafo ute. I tillegg diverse lågspentfeil.
- Vågsøy: Høgspentlinja frå Mehukenvindpark til Kråkenes ligg ute i tillegg til at det er diverse lågspentfeil
- Selje: Det er ein høgspentfeil som gjer at strekninga Moldestad – Venøy – Flatraket – Eltvik ligg ute.
- Eid: på strekninga Ervik-Haus ligg to trafokrinsar ute. På strekninga Sørland-Hamnes-Torheim ligg seks trafokretsar ute. Trafo Lote ferjekai og trafo Sætrebakke ligg ute. I tillegg er det eit ukjend antal lågspentfeil på grunn av omfanget av høgspentfeil.