SISTE: Klokka 16.20 melder politiet at luftambulansen har teke med seg mannen til sjukehus.
– Naudmeldinga frå personen vart fanga opp via ein jaktradio av andre jegerar, og det vart sett i gang søk etter personen i Hjelmelandsdalen, seier operasjonsleiar ved Sogn og Fjordane politidistrikt, Kai Myklebust.
Mannen var åleine, og meldingane tyder på at han kan ha brote foten.
– Han kom seg iallfall ikkje derifrå utan hjelp, seier Myklebust.
Var dårleg mobildekning i området
Politiet fekk melding om hendinga om lag klokka 15.22, og mannskap frå Røde Kors, politi og luftambulanse vart kalla ut.
– Vi hadde litt utfordringar med å få kontakt med mannen, då det var svært dårleg mobildekning i området, seier Myklebust.