For den til no fine hausten blir både vindfull og våt. Endringa kjem i kveld. Og første kvelden og natta blir verst.
Tradisjonen tru vil kysten og fjellet merke den sørlege vinden sterkast.
– Det er varsla liten storm på kysten og i fjellet, men det kan bli kortvarig full storm på kysten i kveld. Ved Stad kan det bli sterk storm, seier Anders Sivle ved Vêrvarslinga på Vestlandet.
Lokalt mykje nedbør
– Låglandet inne i fylket vil ikkje merke stort til vinden, men når vinden minkar til sterk kuling og snur over på sørvest måndag føremiddag så vil ein nok merke det betre innover i fjordane, legg Sivle til.
Lokalt kan det fram til måndag kveld komme opp til 50 millimeter nedbør. Mest midt i fylket, og mindre på kysten.
Og slik vil vêret halde seg utover veka.
– Fastare nedbør i fjellet
– Heile veka ser ut til å vere prega av lågtrykk og vind. Det blir ikkje like ille som i natt og i morgon.
Med andre ord er det berre å feste båtane godt. Og vise omsyn på fjellovergangane. For konsistensen på nedbøren vil halde seg stabil.
– Den er ganske flytande i låglandet, men på mellom 800 og 1 000 meter skiftar den farge og blir fastare i forma, seier Sivle.
Vêrvarslinga har sendt ut Obs-varsel for lokalt vanskelege køyreforhold i fjella i Sør-Norge både søndag og måndag.
– Både Vikafjellet og Filefjell ligg i grenseland, og eg reknar med at Utvikfjellet vil halde seg bert. Men også her bør folk vere obs, avsluttar han.