«Harastølen Hotell» er det førebelse namnet på prosjektet. Ein av dei som står bak er Terje Svindland frå Lyngdal. Han driv i dag mellom anna konferansesenteret Kvåstunet.
Har trua på hotell
– Dette er vel siste tog for Harastølen. Om noko skal bli gjort der oppe, må det skje no, seier ordførar i Luster Ivar Kvalen (Sp).
Ordføraren er oppteken av at den særeigne staden på bevarast for framtida, og trur eit hotell kan vere eit godt alternativ.
– Det er ein fantastisk plassering, med ei flott utsikt. Eg trur absolutt at mange ville vore interesserte i å bu på hotell der. Samstundes kunne vi då ha teke vare på bygningane som er der, seier Kvalen.
Investor med erfaring frå gardsrestaurant
Terje Svindland driv frå før ein serveringsstad og konferansesenter. Han ser føre seg å byggje opp Harastølen etter same modell.
– Vi vil byrje med å få i stand servering og nokre rom i over to høgder i hovudhuset. Etter kvart har vi lyst til å sette i stand alle bygningane på Harastølen, seier Svindland.
– Bygget er i veldig dårleg stand, har de pengar til det?
– Vi har ein del finansiering på plass, men manglar og ein del. Dette vil vere eit prosjekt i klassen fleire titals millionar, og vi tenkjer at det må vere både offentlege og private investeringar på plass.
Har angra på kjøpet
Det er kraftselskapet Tinfos på Notodden som eig Harastølen, og administrasjonssjef Øyvind Odden fortel at dei har jobba lenge for å finne nokon som vil investere i dei falleferdige bygga.
Tidlegare har Tinfoss innrømma at kjøpet av Harastølen var ei dårleg investering. Dei har brukt mykje krefter på å prøve å finne nokon som vil kjøpe det frå dei.
– Vi har vore i dialog med desse aktørane i ei stund no, og har trua på at det kan bli noko av seier Odden.
Ordføraren meiner prosjektet er realistisk
Opp igjennom åra har det vore fleire aktørar som har hatt planar om å ta Harastølen i bruk til eitkvart. Ordførar Ivar Kvalen meiner planane om hotelldrift er blant dei meir realistiske som har kome fram.
– Dei har haldt på med planlegginga av dette i eit par år no, og vi i kommunen har blitt orientert. Eg forstår det slik at dei begynner å få finansieringa på plass, seier Kvalen.