Innbyggjarane vil merke høg gjeld

Sogn og Fjordane fylkeskommune har dobbelt så høg lånegjeld per innbyggjar som landssnittet for fylkeskommunane.

Samtidig ventar ein at fylkeskommunen vil få lågare inntekter i åra som kjem. Den vanskelege situasjonen får fort innverknad på mi og di lommebok.

Fylkesordførar Åshild Kjelsnes varslar at folk sjølv må vere med å betale meir for samferdsleprosjekt, og at fylkeskommunen ikkje kan ta på seg større lån.

– Vi blir nøydde til å ha ei veldig nøktern linje framover, og det blir ei utfordring å sjå kva som eg mogleg å få til utan å auke lånegjelda, seier Kjelsnes til NRK.no.

Nesten to milliardar i gjeld

Ved inngangen til 2013 hadde fylkeskommunen om lag to milliardar kroner i gjeld. Det er over 18.000 kroner per innbyggar – dobbelt så mykje som landssnittet for fylkeskommunane.

– Vi har ein høg lånegrad samanlikna med andre fylke, så vi må vere vaktsame og forsiktige, seier Kjelsnes.

Samtidig nærmar lånegjelda seg 75 prosent av tilgjengelege inntekter. I sakspapira til neste møte i finansutvalet skriv fylkesrådmann Tore Eriksen at "Dette er eit alvorleg varsel sett i lys av at vi ventar reduserte inntekter som følgje av nytt inntektssystem."

• LES OGSÅ: - Endeleg sigra rettferda
• LES OGSÅ: Kallar ferjefri E39 for rein galskap

– Har prøvd å ta eit løft

Heller ikkje Kjelsnes ventar seg gode nyheiter når regjeringa legg fram den nye modellen for fylkeskommunane sine inntekter.

– Alle signala vi har fått frå fagmiljøa seier at dei fryktar for at dette vil slå negativt ut for vårt fylke, seier fylkesordføraren.

– Har fylkeskommunen levd over evne?

– Eg trur fylkeskommunen har gjort nødvendige investeringar, både innanfor opplæringssektoren, men ikkje minst innanfor samferdsle.

– Eg føler vi har vore ansvarlege, men vi har mange utfordringar i fylket vårt, og når vi har prøvd å ta eit løft vil det syne att på lånegjelda, seier Kjelsnes.

• LES OGSÅ: Kjelsnes om lovnad om ferjefri E39: - Det var nesten som å vinne i Lotto
• LES OGSÅ: Store overskot for kommunane

Innbyggjarane må betale meir

Den høge lånegjelda vil få konsekvensar for innbyggjarane. Folk må bu seg på fylkeskommunal smalhans og å betale meir sjølve framover.

– Til dømes innan samferdsle, så må ein sjå på ulike former for brukarbetaling, spleiselag og liknande.

– Dette er ikkje noko lett match, og innbyggjarane i fylket må sjå at det blir lågare investeringar, seier Kjelsnes.

• LES OGSÅ: Fekk ikkje læreplass - krev no erstatning frå fylkeskommunen
• LES OGSÅ: Må kutte mellom 72 og 97 millionar