Ikkje stolt av å vere beste norske

– Det er ikkje noko kjekt å vere beste nordmann når du kjem på 20. plass, seier Fannemel til NRK.no.

Han er ikkje nøgd med si eiga hopping som tok han ned til 176 meter i første omgang, og 175.5 meter i andre omgang.

– Eg synst eg hoppa ganske dårleg, og er skuffa over meg sjølv, seier han.

Skuldar berre på seg sjølv

Dei aller beste norske deltok ikkje i skiflygingsrennet i Kulm i dag, og dei norske gutane som var med i finaleomgangen kunne ikkje sørge for noko norsk jubeldag. Fannemel vart som sagt beste nordmann på 20. plass, medan Rune Velta hoppa seg inn til ein 26. plass.

Rennet blir truleg aller best huska for at 41-åringen Noriaki Kasai stakk av med sigeren. Dermed vart han den eldste hopparen som har vunne eit verdscuprenn gjennom tidene.

• LES OGSÅ: Kasai (41) hylles etter sin første seier på ti år

Anders Fannemel ser ingen grunn til å gle seg over resultatet.

– Eg håpar Norge som nasjon skal gjere det best mogleg, og då er ikkje 20. plass bra nok.

– Kva er det som går gale for deg i dag?

– Eg blir trykt litt for mykje saman i satsen, og då sklir eg berre gjennom på hoppet. Det klarar eg ikkje fly på, og då blir det for dårleg, seier han og vil ikkje skulde på forholda.

– Eg har berre meg sjølv å skulde på. Eg klarar ikkje takle bakken enno, seier honndølen.

• LES OGSÅ: – Det burde ikkje vore renn i dag
• LES OGSÅ: Ergrar seg framleis over Oberstdorf-miss

(Artikkelen held fram under)

Ikkje prega av Morgenstern sitt fall

Fredag ramla hoppstjerna Thomas Morgenstern svært stygt i skiflygingsbakken i Kulm. 27-åringen fekk hovudskadar og ei punktert lunge, men laurdag melder austerrikske aviser at tilstanden til hopparen har blitt betre.

• LES OGSÅ: Bedring for Morgenstern etter skrekkfallet

– Det såg ikkje bra ut i det heile teke. Det er synd slike ting skjer, men vi driv ein sport der det er risiko for at slike ting kan skje, seier Fannemel.

Han seier uhellet i går ikkje prega han under dagens renn.

– Eg vil ikkje seie eg er prega av det, vi er klare over risikoen og har det i tankane. Men når vi er på bommen må vi ha fokus på hoppinga og stole på at det går bra, seier Fannemel.

Vil ned mot bakkelengde søndag

Gregor Schlierenzauer har bakkerekorden i Kulm på 215,5 meter. Så langt trur ikkje Fannemel han greier strekkje seg i morgon, men lenger enn 176 meter må det bli.

– No skal eg sjå litt på teknikk, og prøve finne ut korleis eg kan hoppe betre i morgon.

– Eg håpar å få til bra skihopp, så får vi sjå kva det held til. Kanskje ned mot bakkestorleiken på rundt 200 meter, seier Fannemel.