– Vi hadde lyst å ta nabopraten

Kommunal- og moderniseringsminister Jan Tore Sanner (H) har bede fylkeskommunane om å vurdere moglegheita for å slå seg saman med nabofylke.

I Sogn og Fjordane har fylkestinget vedteke at dei vil snakke med både Møre og Romsdal, Hordaland og Rogaland. Frå nabofylket i nord kjem det no eit kontakt «nei» tilbake.

• Les også: Ønsker ingen naboprat: – Møre og Romsdal er stort nok

– Det er ikkje noko overraskande vedtak. Dette var oppe på eit møte i arbeidsutvalet i Vestlandsrådet, og der var fylkesordførar Jon Aasen veldig klar på at dei ikkje ville ta initiativ til ein nabosamtale, seier fylkesordførar Jenny Følling (Sp) til NRK.no.

«Sterkt nok, stort nok og nært nok»

Samtalane om samanslåing av kommunar har kome godt i gang landet rundt. I sommar bad kommunalminister Jan Tore Sanner (H) om at også fylkeskommunane tok ein prat med sine nabofylke.

Men dei fremste fylkespolitikarane i Møre og Romsdal er fint lite interesserte i å snakke om ei eventuell samanslåing med andre fylke.

Ifølgje Sunnmørsposten er det samrøystes vedtaket i fylkesutvalet klinkande klart: «Fylkestinget meiner Møre og Romsdal er sterkt nok, stort nok og nært nok til å vere eigen region også i framtida».

• Les også: Florøværingane framleis skeptiske til kommunesamanslåing
• Les også: Berre 800 innbyggjarar, men avviser kommunesamanslåing

– Umogleg

Fylkesordførar i Møre og Romsdal, Jon Aasen (Ap), seier det er umogleg for dei å inngå i eit stort Vestlandsfylke.

– Sogn og Fjordane har ingen ønskje om ei samanslåing berre med Møre og Romsdal. Fylket ønskjer eit samarbeid med Hordaland og vil ha oss som motvekt.

– Eit storfylke med oss, Sogn og Fjordane og Hordaland, veit eg er umogleg for Møre og Romsdal å gå inn på, seier Aasen til Sunnmørsposten.

Følling nektar for at dette stemmer.

– Dette syns eg ikkje er korrekt. Nordfjord har ei tett tilknyting til Møre og Sunnmøre, og den sørlege delen av fylket har tett tilknyting til Hordaland. Så skal vi ta nabopraten er det like relevant å diskutere med Møre og Romsdal, som med Hordaland, seier ho.

• Les også: Delte i synet på om kommunen kan splittast ved ei kommunesamanslåing
• Les også: Kommunesamanslåing engasjerer

– Må få vareta sine interesser

Ho understrekar at det framleis er mange lause trådar med tanke på ei eventuell samanslåing av fylke på Vestlandet, men at samtalar er viktige første skritt.

– Er du skuffa over at Møre og Romsdal ikkje vil gå inn i ein slik samtale?

– Eg tenker det hadde vore konstruktivt å vere med i samtalar. Men Aasen var veldig tydeleg på at dette er problematisk for Møre og Romsdal, og dei må få vareta sine interesser, og vi våre, seier Følling.