Ei undersøking gjort av NRK Sogn og Fjordane, viser at godt over 500 nye hytter er venta i kystkommunen Gulen dei neste åra. Sverre Martin Stensæth i Gravdal Prosjektutvikling er ein av dei som satsar tyngs her, med eit nytt hyttefelt på 95 hytter på Dingeneset.
– Hyttene er tenkt plassert her ved innløpet til Sognefjorden, seier han.
Mest attraktive kommunen
Stensæth står mellom bakkar og berg på Dingeneset i Gulen kommune og speidar ut over sjøen. Ein sjø som her inne ligg roleg, avskjerma av holmar og skjer, sjølv om vinden får lyngen til å danse.
Dei 95 hyttene er i underkant av ein femtedel av det som er venta i Gulen kommande åra. Det gjer kommunen til den mest attraktive kommunen for hyttebyggjarar i fylket.
– Det er i alle fall ei stor pågang på dei hyttene som er ledige, seier han.
2700 nye hytter
Det er venta ei storstilt hytteutbygging i Sogn og Fjordane dei neste åra. Ein ringerunde viser at om lag 2 700 hytter er planlagte i 21 kommunar i fylket.
Etter Gulen er det Sogndal som har dei mest ambisiøse planane med rundt 400 nye hytter. Etter det kjem Jølster og Stryn. Blant desse er det hytteutbygging rundt skitrekka som utgjer mesteparten.
I botnen av lista ligg Årdal, Selje og Leikanger kommune. På Leikanger har det ikkje blitt bygd ei einaste hytte dei siste fem åra.
Spennande skjergard
Gulen er suveren for hyttebyggarar. Men kva er grunnen til det? Det er ikkje kvite strender, det er Ikkje skitrekk, det er jo ikkje snø her ein gong. Og på toppen av det heile river kalde vindkast i oss.
– På flotte dagar er det berre heilt utruleg her. Det er varmt og godt, seier Stænseth.
Ordførar Hallvard Oppedal meiner Gulen kommune er ein av dei flottast i landet. Hyttebølgja som har skylt inn over strandlinja, forklarar han med den spennande skjergarden.
– Det er særs flott for båtturisme. Vi har 1500 øyar, holmar og skjer. I tillegg er det kort veg til Bergen.
I Gulen doblar folketalet seg frå vel 2000 innbyggarar til 4000 om sommaren når hyttefolket er på plass. Det er først i seinare tid det har blitt sånn.
– Vi har ikkje hatt hyggebygging i så veldig mange år her, seier Oppedal.
Populært blant bergensarar
Det er stort sett bergensarar og andre frå Hordaland som vil ha hytte i Gulen. På nærbutikken på Dingja, eit steinkast i medvind frå Dingeneset, jobbar Åse Lene Vatne. Ho gler seg til å få nye naboar.
– Eg tykkjer det fantastisk, uansett kven som kjem. Dei er hjarteleg velkomne, for vi har det fantastisk her ute.
Og sjølv om det bles litt i Gulen, so stoppar ikkje det hyttebyggarane.
– Dei overser nordavinden, men er sjølvsagt glade når den er vekke.