I går vedtok hovudutvalet for plan og næring i Sogn og Fjordane fylkeskommune å gje fråflyttingskommunen tre millionar kroner. Pengane skal gå til omstillingsarbeid i år og neste år.
Ordførar Jan Olav Gjerde (Ap) vedgår at det er kjærkomne pengar i ei slunken kommunekasse.
– Dette betyr at vi ved sidan av det kommunale budsjettet kan drive med tiltak som styrkar næringsstrukturen i kommunen, og som kan danne grunnlag for å få fleire til å flytte hit, og fleire arbeidsplassar, seier ordføraren.
Den dårlege trenden held fram
Den vesle kommunen i Ytre Sogn har slite med fråflytting i ei årrekkje. Fjoråret vart ikkje noko unntak, då gjekk folketalet ned med ytterlegare 39 personar.
– Eg synest det er litt rart, for det skjer veldig mykje i Hyllestad for tida. Likevel ser vi at folketalet går ned, seier ein oppgitt Jan Olav Gjerde.
- LES OGSÅ:
- LES OGSÅ:
I tillegg til Hyllestad får også Askvoll, Årdal og Lærdal forlenga sin status som omstillingskommune.
Fråflytting og einsidig næringsliv
For Hyllestad sin del er grunngjevinga for å løyve tre millionar kroner til omstilling ein kombinasjon av fråflytting, og eit einsidig næringsliv i kommunen.
– Hyllestad er hardt råka av fråflytting. Kommunen er i tillegg heilt basert på hjørnesteinsverksemda ved verftet til Havyard i Leirvik. Kanskje bør dei prøve skape noko anna rundt det, seier Hilmar Høl som er leiar i hovudutval for plan og næring.
- LES OGSÅ:
- LES OGSÅ:
Vil gjere seg lekre for bedrifter
Og ordføraren i Hyllestad har planen for pengane klar. Han håpar kommunen skal greie gjere seg lekker for bedrifter, slik at fleire vel å etablere seg nettopp der.
– Vi hadde for kort tid møte med ei spennande bedrift som snusar på Hyllestad Utviklingspark i Leirvik. Allereie for nokre år sidan starta selskapet Multivolt opp der, og dei vil no utvide ganske kraftig. I tillegg har vi fleire bedrifter som vi rettar oss mot for å sjå på moglegheitene for oppstart, seier Gjerde.