– Spennande at vi har sett oss ned
Planane er blitt diskuterte på fleire kantar. I politiske krinsar er dei blitt møtte med både interesse og skepsis. Førebels er det uvisst kva som vil skje og eventuelt når det vil skje noko.
Ein som i alle fall er positiv, er konserndirektør i Hydro, Arvid Moss, som besøkte SFE på Sandane i dag. Han meiner ei samanslåing av dei største selskapa som produserer kraft på Vestlandet er viktig for å sikre utviklinga av aluminiumsverka i Årdal og Høyanger.
– Eg synest det er spennande at vi no har sett oss ned for å diskutere ei større eining som kan bidra til å få fram ny vekst og ny industri på Vestlandet. For oss er dette ei spennande utgreiing å delta i, men vi har ein lang veg fram, seier Moss.
– Må ha langsiktige kontrakter
– Kor viktig er dette for Hydro på Vestlandet?
– Som alle veit er kraftproduksjon og aluminium knytta tett saman. Vi brukar 12-13 prosent av all kraft som vert produsert i Norge. At vi har god forsyning frå eigne kraftverk og lange kontrakter med andre kraftselskap er heilt avgjerande for at vi skal gjere store investeringar i Norge. Og det er det vi ønskjer. Vi ønskjer å utvikle alle aluminiumsverka våre. Det gjeld og verka i Høyanger og Årdal.
Han har tidlegare også understreka viktigheita av ein slik fusjon:
– Eit stort produksjonsselskap kan gjera Vestlandet meir attraktivt for eksisterande og ny industri, og dermed kunne bidra til fleire industriarbeidsplassar og auka verdiskaping.
