Ho kan ikkje hugse ein betre sesong

– Vi har aldri hatt så mange overnattingar i september som i år, og vi har vel heller ikkje hatt eit så høgt trykk i oktober før heller. Det seier Kari Kvikne ved Kviknes Hotel i Balestrand.

Reiselivet på Vestlandet kan juble over ei ti prosent auke i talet på overnattingar i sommar, og dei gode tidene ser ikkje ut til å ha teke slutt med sommarferien.

Les også: Dette lokkar heile vegen frå Kuwait

Hotell og campingplassar over heile Vestlandet melder no om at turistane har fått auga opp for haustsesongen, og vel å leggje ferien sin til september eller oktober. Kvikne seier at dei merkar det godt i Balestrand.

– Det er jo like fint her på hausten som om sommaren, og så er det litt rolegare og litt betre plass. Vi har jo uansett hatt heilt fullt i sommar, så for oss har det vore viktig å trekke folk i skuldersesongane og.

God haust på heile Vestlandet

Wenche Salthella i NHO reiseliv seier at den gode haustsesongen ser ut til å vere ein trend på heile Vestlandet.

– Vi har jo hatt ein heilt fantastisk sommarsesong i år, men vi ser absolutt at det også smittar over på hausten. Vi får signal frå mange stader at dei siste vekene har vore veldig gode.

Salthella trur ein låg kronekurs er litt av forklaringa.

– Det er klart at det er mykje billegare å feriere i Noreg no enn det var for litt sidan. Også er det veldig i vinden med gode naturopplevingar, og autentiske destinasjonar. Der kjem jo vi godt ut.

Vil prøve på heilårsdrift

For Kviknes Hotel har den gode hausten gitt forhåpningar om at ein kanskje kan dra det endå lenger. No tenkjer ein heilårsdrift.

– Det er jo målet på lang sikt. Då er det ein del ting som på plass først. Skal vi få det til her i Balestrand må vi få med fleire på laget. Det nyttar ikkje at alle aktivitetane stenger ned 1. september om vi skal prøve å halde det gåande heile året, seier Kvikne.