– Vi må bygge organisasjonen nedanifrå og opp, appellerte olje- og energiminister Terje Søviknes til fylkesårsmøtet i Sogn og Fjordane Framstegsparti.
Og det er kanskje ikkje tilfeldig at det var organisasjonsbygging statsråden valde å fokusere på i sin appell til møtet.
Ved førre val, kommunevalet i 2015, stilte Frp liste berre i 10 kommunar. Fylkesleiar Lars-Svein gav indre uro skulda.
I toppen av Frp si nominasjonsliste til stortinget skjer det omveltingar. Som nummer ein tronar Britt Dalsbotten, eit mindre kjend blad i Frp sitt politiske miljø i fylket.
Ho drøymer om plass på stortinget, sjølv om partiet går i motvind inn i valkampen.
Drøymer om nasjonal politikk
– Eg har aldri vore den som klarar å halde meiningane mine for meg sjølv, seier Britt Dalsbotten frå Bremanger om kvifor ho fann vegen inn i politikken.
Då ho sat som tillitsvald i Bremanger Raude Kors, hamna ho i diskusjon med andre frivillige som stemde Frp. Då synte det seg at engasjementet hennar passa godt saman med Frp sitt partiprogram.
– Dei sa «Britt, alt det du seier er i Frp sitt program. Vil du ikkje berre melde deg inn?». Eg hadde aldri tenkt på det. Det enda med at eg melde meg inn og ganske kjapt fekk plass i styret, fortel Dalsbotten.
No er draumen å ta steget opp til nasjonal politikk.
– Det er jo ein moglegheit eg ikkje kan seie nei til. Kor stor sjanse for at vi får eit mandat, vil jo vise seg. Men vår klare ambisjon er å få inn ein på stortinget. Og om eg får stå på topp, så blir det vel meg, då!
Friskt pust
– Britt Dalsbotten er eit friskt pust og fornying i partiet. Det bur mykje i ho, så eg meiner ho er ein flott kandidat, seier statsråden Terje Søviknes om den forholdsvis ferske kandidaten
på toppen av lista.
Sjølv ho ikkje er den i partiet med lengst fartstid, er ho er ikkje redd for å ta steget ut av fylket om moglegheita skulle by seg.
– Det er ikkje skummelt, bere spennande. Det er ein utfordring eg tek på strak arm.
–Kva er hjartesakene dine?
– Å, det er mykje. Samferdsel, her i fylket er det alfa omega for å knyte saman bu og arbeidsmarknad. Skatt- og avgiftspolitikk, at vi kan gi føreseielege rammevilkår for næringslivet. Innvandring og integrering er frykteleg viktig. Å stille krav til dei som kjem, og fortast mogleg få dei til å vere bidragsytarar i samfunnet.