NRK Meny
Normal

Historisk sigersrekkje rauk på overtid

FOSSHAUGANE (NRK): Kristian Fardal Opseth og Sogndal såg ut til å slita seg til den åttande tre-poengaren på rad, men ei Jerv-kanonkule i det 91. minuttet stoppa ei sigersrekkje, som ville ha gått inn i historiebøkene.

Sigeren glapp på overtid

BERRE NESTEN HISTORISK: Målet til Sogndal-spiss Kristian Fardal Opseth såg lenge ut til å sikra Sogndal sin åttande siger på rad.

Foto: Steinar Lote / NRK

Det bryr eg meg ingenting om, er Sogndal-trenar Eirik Bakke sin kommentar til at sigersrekkja rauk på overtid, før han utdjupar:

– Me har sjølvsagt lyst til å vinna både 10, 11 og 12 kampar på rad, men rekordar er eg ikkje oppteken av.

(Artikkelen held fram under videoen.)

Bakke etter kampen

IMPONERT OVER INNSATSEN, TRASS POENGTAP: – Me er skuffa, men det er ingen grunn til å grava seg ned, seier Sogndal-trenar Eirik Bakke etter 1-1 mot Jerv.

– Surt

Med den allereie så smått legendariske 4-0-sigeren over Brann i Bergen sist søndag tangerte Sogndal klubben si lengste sigersrekkje frå jubelsesongen i 2000.

Sjokktapet mot Levanger blei nemleg ein vekkjar for serieleiaren i 1. divisjon, og sju strake sigrar seinare skulle Sogndal i kveld smadra rekorden på heimebane mot Jerv, men den åttande tre-poengaren glapp på overtid:

Like etter at Sogndals Eirik Skaasheim hadde brent ein grandios sjanse åleine med Jerv-keeperen, sendte Nils Petter Andersen på bortelaget av garde ei kanonkule frå 30 meter, som gjekk via Sogndal-stoppar Christophe Psyche og i mål.

Det hadde vore moro å få den rekorden, men fyrst og fremst er det seigt å missa to poeng på denne måten, seier Sogndal-kaptein Rune Bolseth, som er den einaste på dagens lag som òg var med for femten år sidan.

(Artikkelen held fram under videoen.)

Bolseth etter kampen

HADDE LYST PÅ REKORDEN: Kaptein Rune Bolseth var òg med på det Sogndal-laget som vann sju sigrar på rad i 2000.

– Ingen grunn til å grava seg ned

Tremålshelten frå Brann-kampen, Kristian Fardal Opseth, såg lenge ut til å ha sikra Sogndal ein slitesiger med 1-0-skåringa i det 52. minuttet. Sjølv om det ikkje gjekk slik, gir likevel ikkje kaupingen opp håpet om rekord denne sesongen:

– Det er absolutt mogleg, så lenge det er att nok kampar, men for å vera ærleg er eg ikkje så altfor oppteken av det. No handlar det om å revansjera oss mot Hødd på laurdag.

Også Sogndal-trenar Bakke har festa blikket mot neste heimekamp:

– Me er skuffa, men det er ingen grunn til å grava seg ned. Sjølv om me må opp fleire hakk mot Hødd, er eg imponert over den innsatsen gutane legg ned i kveld.

Laster innhold, vennligst vent..
Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.