– Det minte meir om ein polsk riksdag enn eit politisk møte i ein norsk kommune, seier Clara Øberg.
Ho er tidlegare etatssjef og barnevernsleiar i Sogndal. Øberg er også tidlegare kommunestyrerepresentant for Ap i Sogndal og framleis medlem i partiet. Under kommunestyremøtet i går sat ho på tilhøyrarbenken.
Bakteppet for konfrontasjonen mellom rådmannen og delar av kommunestyret, er den langvarig striden i Sogn barnevern.
– Eg vart utsett for eit uverdig spel, seier rådmann Jostein Aanestad i Sogndal.
Vil ikkje trekkje seg
I går vart rådmannen igjen skulda for i fleire tilfelle å ha kome med løgn overfor kommunestyret, noko rådmannen kontant avviste.
– Eg har ikkje vore borti maken til møte. Det vart framført påstandar på talarstolen som ikkje er verdig eit kommunestyremøte, seier rådmann Jostein Aanestad.
– Er kritikken mot deg kome på eit slikt nivå at du vurderer å trekkje deg?
– Nei, eg har ikkje slike planar, seier Aanestad.
TUNGT: – Eg har ikkje vore borti maken til møte. Det vart framført påstandar på talarstolen som ikkje er verdig eit kommunestyremøte, seier rådmann Jostein Aanestad.
Foto: Noralv Pedersen / NRKAvviser mobbing
Arne Glenn Flåten (H) var ein av dei som kom med den skarpaste kritikken mot rådmannen.
– Eg er ikkje vald inn i kommunestyret for å tilfredsstille korkje rådmannen eller ordføraren. Eg er der for å gjere ein skikkeleg jobb og for å seie det som er viktig og rett. Når rådmannen gong på gong har kome med feil opplysningar, er det vår plikt å seie ifrå, seier han.
– Det blir hevda du og andre dreiv med direkte mobbing av rådmannen. Tek du sjølvkritikk?
– Ikkje i det heile tatt. Når rådmannen turar på og ikkje vil vedgå feil, må ein forvente at nokon seier stopp. Vi finn oss ikkje i å bli førde bak lyset. Dette er ikkje mobbing i det heile tatt. Rådmannen må tole å høyre sanninga, seier Flåten.
AVVISER MOBBING: – Det er heilt feil at vi skal ha mobba rådmannen. Det å få høyre sanninga er ikkje mobbing, seier Arne Glenn Flåten (H).
Foto: Noralv Pedersen / NRKOrdføraren tek sjølvkritikk
Ordførar Jarle Aarvoll (Ap) synest det er trist at rådmannen skal takast heile tida.
– Mange grenser vart brotne på møtet i dag. Når eg får fleire meldingar om politikarar som føler det er ubehageleg å delta i kommunestyremøte, er det gått for langt. Det er ikkje slik vi vil ha det, seier Aarvoll.
– Men det var du som leia møtet. Kvifor klubba du ikkje ned dei du meiner gjekk for langt?
– I ettertid seg eg at fleire politikarar burde ha vore klubba ned. Dette tek eg sjølvkritikk for, seier ordføraren.
