– Det var veldig spanande og godt å kome i gang med fysisk arbeid på prosjektet. Etter om lag fem år med planlegging var det på tide, seier prosjektleiar Magne Helle.
To store varmepumper skal sørge for at godt oppvarma vatn blir frakta rundt og ender opp som oppvarming i ulike bygg i Førde. Helle seier det framleis er eit år att før anlegget kjem i drift.
– Rundt femtande september 2017 vil anlegget vere i drift for delar av Førde. Etter planen så skal anlegget i hovudsak stå ferdig i løpet av 2017.
Av dei største i landet
Prosjektet skal etter planen koste 145 millionar kroner. Fjordvarmeanlegget i Førde skal bli eit av dei største varmeanlegga i landet som baserer seg på sjøvarme. Helle forklarer at det primært er større bygg og konsentrert utbygde område som skal koplast til varmen.
– Sjukehuset er den største kunden, og i tillegg har vi mange av dei store kommunale bygga som kundar. Så har vi fleire næringsbygg og nokre bustadområde som skal knytast til nettet. Då er det gjerne felt med konsentrert utbygging der det er mogleg å legge til rette for fjernvarme. Å kople på enkelthus er slik som kan vurderast, men det må vere økonomisk forsvarleg.
– Miljøriktig
Det var ordførar i Førde, Olve Grotle, som fekk æra av å stikke den første spaden i jorda på prosjektet. Han synest det er kjekt at det no er i gang.
– Det er moderne og miljøriktig infrastruktur som mellom anna vil fase ut mange av dei oljefyringsanlegga vi har her i byen. For Førde kommune var det viktig å vere med på dette då det er bra for miljøet. Det var og viktig, for utan oss trur eg ikkje dette hadde vore mogleg å realisere.