Norge har dei siste vekene sett fleire store brannar gjere store skader og skape stor frykt.
I Vievegen i Førde tok bebuarane grep for å hindre ein potensiell katastrofe om ei lita glo skulle få tak eitt av torvtaka til åtte-ti hus som ligg tett i tett.
– Vi har hatt det tørt i mange veke. Vi har hatt brannen i Lærdal og den som no herjar i Trøndelag. Det set ein liten støkk i deg, seier Frode Steen til NRK.
Skulle ha brannøving
Dermed bad bebuarane om ein slange, men fekk onsdag både brannbilar og 10–15 brannmenn som tok til å spyle torvtaka.
For meteorologane kan førebels ikkje love noko meir nedbør før ut i neste veke.
– Vi skulle ha brannøving likevel, så i staden for å trene på noko anna så får dei no spyle litt, køyre pumpe på brannbilen og leggje ut slangar og heile pakka, seier brannsjef Bernard Øberg i Førde og Naustdal brannvesen.
– Ingenting skal vere uprøvd
Tysdag vart det lagt ned totalforbod mot open eld i Sogn og Fjordane. Fleire kommunar har også følgd opp og presisert at dette også gjeld for gravlykter på kyrkjegardane.
For det er ikkje tvil om at brannen som kravde 17 bustadhus i Lærdal, brannherjingane i Flatanger og storbrannen på Frøya har sett ein støkk i det norske folket.
(Artikkelen held fram under biletet)
– Vi skal prøve alt for å unngå at det byrjar å brenne i Førde. Det er også difor vi er her i kveld. Ingenting skal vere uprøvd for å unngå brann som vi har sett elles i Norge, seier Øberg.
Skal lite til
– Kjem det ein sneip eller ei glo frå pipa her, så er det så tørt at det kan ta fyr, seier Øberg. Brannvesenet brukte to-tre timar på spylinga onsdag kveld.
– Er det slik at fleire bør ta kontakt?
– Det er spesielt her i gamle Vievegen med åtte-ti hus i rekkjer med torvtak, men er det andre kring om som har torvtak, så stiller vi og spyler slik situasjonen er no.