For Jonn spring ikkje. Han spurtar.
– Å vere i aktivitet er viktig uansett alder. Eg pleier å seie at 80 er ikkje nokon alder, 80 er berre eit tal.
Akkurat det er Jonn Beinnes eit eksempel på. Ikkje berre spring han lett på foten, han har fråspark i skiløypa og.
– Det vart rundt 1500 kilometer i vinter, om lag 7 mil på ski i veka, seier Jonn, som om det er noko daglegdags.
Ikkje fornøgd
Det er slett ikkje alle som er født i 1938 som slit ut joggeskoa. Når NRK møter Beinnes til 60-metersduell, er han litt stiv i beina etter gårsdagens tur.
– Eg starta på skisenteret i Stryn, gjekk lysløypa mot Tverrfjellet, så til Ullsheim, opp til Holsætra og ned att. Ein pen tur på 15 kilometer, med varierande løp og gonge, konstaterer 80-åringen under oppvarming.
Det var under friidrettsgruppa si trening i førre veka at Jonn Beinnes slengde seg med. Utan oppvarming sprang han 60-meteren på 12.33 (sjå video), noko han sjølv meinte var for slapt.
– Eg skal ned på 11-talet før eg gjer meg.
Ny pers
NM-rekorden på 100-meter for veteran er på 15.21, sett av Arne Ueland i 2014. Å delta på Veteran-NM vil ikkje Beinnes høyre snakk om.
– Du seier eg kanskje er ein av dei beste, det er sikkert berre tull. Det er sikkert mange 80-åringar som spring mykje fortare enn meg. Det trur eg.
Godt oppvarma, men utan heilt profesjonell tidtaking spring Beinnes inn på tida 11.83.
– Der har du det, var den fornøgde reaksjonen på tida.
Truleg vert 80-åringen å sjå på treninga til friidrettsgruppa igjen, ganske så snart.