Her skal ikkje sommarvarmen vere eit problem lenger

Helse Førde er no i gang med eit prosjekt som skal betre det dårlege inneklimaet ved avdelinga.

På høg tid, meiner fylkessekretær i Landsforeininga for Pårørande innan Psykisk Helse (LPP), Astrid Gytri.

• Les også: Helse Førde byggjer for 142 millionar

– Dette har vore eit problem sidan bygget vart teke i bruk. Det er sterkt beklageleg at Helse Førde ikkje har teke tak i dette tidlegare, seier ho.

– Dårlegare tilbod

Bygget fekk i 2009 heiderleg omtale for utforminga si i konkurransen om byggeskikkprisen , men innvending har ikkje bygget vore ideelt verken for tilsette, pasientar eller pårørande.

Gytri fortel at særskilt manglande solskjerming er problematisk i periodar med fint vêr, slik som tidleg i juni i år.

• Les også: Helse Førde vil kutte 50 årsverk

– Pasientar og pårørande klaga over at det var altfor varmt. Det var ikkje mogeleg å lufte på romma og mange vindauge i bygget kunne ikkje opnast. Det gir pasientane eit mykje dårlegare tilbod enn dei skulle hatt, seier ho.

Må prioritere

Direktør for Drift og Eigedom i Helse Førde, Kjell Inge Solhaug, skjønar at folk stussar over at ingenting er gjort med solskjerminga – før no.

Han seier at det er mange bygg som treng utbetring og vedgår at det då blir kamp om avgrensa midlar.

• Les også: Kan bli årelang vikarkabal innan psykiatrien

– Vi har 90 000 kvadratmeter, og dette er berre ein liten del av det Helse Førde har. Det går på mangel på midlar og korleis klare å prioritere undervegs, seier han.

Sopp, algar og ròteskade

Manglande solskjerming er ikkje det einaste problemet med bygget som vart ferdigstilt i 2004. I 2012 slo ein rapport fast at ytterveggane i sibirsk lerk hadde lokale ròteskadar, og at det grodde sopp og algar.

Konklusjonen var at den var ueigna og burde skiftast ut. Til no har Helse Førde utført naudsynt vedlikehald. No skal dei sjå på heile bygget.

– Ein kan med sjølvsyn sjå at det ikkje er noko kritisk for bygget, men eg føler det mest prekære går på å skjerme dei inne mot varme, seier han.

Går ikkje utover drifta

Gytri tykkjer det er bra at Helse Førde no ordnar opp i manglane ved bygget og trur dette vil vere gunstig for den psykiske helsa. Samstundes fryktar ho at oppussinga betyr nedskjeringar i sjølve drifta.

Dette avviser direktør Solhaug.

– Dette er prioritering av vedlikehaldsmidlar som ein har, og som ein skal bruke på heile porteføljen vår på, seier han.