– Det er viktig at nokon står opp, ser moglegheitene og satsar litt i motgangstider også, seier Ole Anders Smørdal.
Han er prosjektleiar for subsea ved Westcon i Florø, og saman med verftssjef Mikael Johansen viser han NRK.no rundt på verftet i kystbyen. Her satsar verksemda stort på subseastrukturar og ombygging og vedlikehald av skip.
Snart er dei også klare for å ta imot oljeriggar på det splitter nye kaianlegget.
– Vi held på å byggje ny kai på eit nytt område. Dette er ei investering i 100-millionarklassen. Vi håpar det skal styrkje oss i marknadssituasjonen, seier Johansen.
- Les også:
Riggar seg med tanke på betre tider i bransjen
Prisfall på nordsjøolje har ført til massiv nedbemanning i oljebransjen. Ifølgje DNB Market si oversikt over jobbkutt, har mellom 13.570 og 14.895 stillingar forsvunne sidan 2013 – mellom 8.900 og 9.400 av desse har komme i 2015.
- Les også:
– Vi merkar også trykket på at prisane skal ned og at det er kamp om oppdraga. Men vi har tru på det vi held på med, og vi veit at det alltid er plass til dei beste, seier Johansen.
Den siste tida har Westcon i Florø tilsett folk medan bransjen har opplevd masseoppseiingar. To nye ingeniørar, éin prosjektleiar, éin innkjøpar og fem lærlingar og traineear har komme inn dørene.
– Vi vil rigge oss for tidene som vi håpar skal bli betre. No har vi moglegheita til å trekkje til oss kompetanse som ønskjer å vere med på det vinnande laget vårt, seier verftssjefen.
- Les også:
Skal vere blant dei beste for å få arbeid
Johansen ser utover kaianlegget som skal vere ferdig i løpet av året. Verftet hans har 110 fast tilsette, men har jamt over 300 menneske i arbeid. På det meste har dei vore oppe i 700 arbeidarar dei siste åra. Alt kjem an på ordretilgangen.
Samstundes kan 250 arbeidsplassar i Flora forsvinne i løpet av året som følgje av at Statoil legg ned forsyningsaktiviteten. I tillegg vil skifte av operatør for røyrhandteringa truleg gjere at endå fleire mister jobbane sine.
- Les også:
– Klart det er tøft. Men ein kjem ingen veg med å setje seg ned og vente til det går over. Då er det for seint, seier Smørdal.
– Vi har tru på at det alltid er plass for dei beste verfta. Og viss vi syter for å vere blant dei beste, vil arbeid også komme til oss. Difor torer vi å tenkje lenger fram enn berre til denne hausten, seier Johansen.