Her reddar dei båtane frå plankedøden

Målet var å flytte båtane frå ei gamal sjøbu i Torskangerpollen i Vågsøy til fiskerimuseet Måløy.

– Desse skal inn på fiskeri- og opplevingssenteret som vi jobbar hardt for å få til inne på ei gamal fiskebu i Måløy, det som var Kvaløy og co. tidlegare. Det er ei bod med rikeleg fiskerihistorier både av reieriverksemd og all slags fiskemottak og styr og stell.

Det seier Arthur Jensen i Fiskerimuseet.

Kan vere over 85 år

Tysdag var ein gjeng med karar i gang med å flytte ut dei to båtane, som har stått i sjøbua i Torskangerpollen i fleire tiår. Ein av dei er frå 50-talet, men den andre, ein notegavl, er frå 30-talet, om ikkje endå eldre.

– Den kan vere eldre, for det er folk over 50 år som ikkje kan hugse anna enn at den har stått her i bua, seier Jensen.

Han var svært spent på om båten ville flyte.

– Båten er i veldig god forfatning, ikkje sprekkar eller noko, så det skal bli veldig spennande å sjå når vi får den på sjøen kor tett den er.

Kom seg trygt på sjøen

Båten frå 50-talet kom først ut på, og dei kunne fort konstatere at den var tett.

– Det er ein lettbåt som dei brukte som ein basbåt, sjefen for notelaget. Det var den som styre i den tida. Det har vore eit ekkolodd i den båten også, fortel Jensen.

Også båten frå 30-talet viste seg å flyte, og dermed kunne turen til Måløy starte, der dei venta å ha båtane på land tysdag ettermiddag.

Høyr meir om dei spennande funna i sjøbua i lydklippa ovanfor.