Her opnar han ny oljekran i Florø

– Det er den første plattforma som er drive av BG på norsk sokkel. Det er ein installasjon som vil skape store verdiar for Norge og ikkje minst varig sysselsetting her i Sogn og Fjordane, seier Olje- og energiminister Tord Lien (Frp), til NRK.

Knarrfeltet er eit olje- og gassfelt i den nordlege delen av Nordsjøen, 120 kilometer vest for Florø. «Petrojarl Knarr» er eit plattformskip, og ifølgje standard.no er det eit flytande produksjons-, lagrings- og lossefartøy, som har lagerkapasitet på 131.000 m³ og maksimal oljeproduksjon på 10.000 m³ per dag.

• Les også: Tru på at oljen framleis vil tene fylket

Varige arbeidsplassar

– Dette er ein stor dag for oss i BG i Norge. Vi er veldige glade for å kunne ha opninga av Knarrfeltet her i Florø, kor vi har operasjonskontoret, seier Marianne Eide, feltutbyggingssjef for Knarrfeltet.

Oljeaktiviteten skaper arbeidsplassar også på fastlandet.

– Akkurat no har vi rundt 30 personar som sit her på kontora våre på basen. Dersom vi finn fleire ressursar på Knarr-feltet, kan vi sjå for oss ein forlenga periode med den bemanninga. Men i ein stabil driftsfase vil vi vere rundt 15 personar her på bygget vårt i Florø, seier Eide.

• Les også: Lempar på krav til basen i Florø
• Les også: – Oljenæringa er blitt ein solnedgangsindustri

Betyr mykje for Florø-samfunnet

Også ordførar Bengt Solheim Olsen (H) jublar i kveld.

– At BG saman med Teekay etablerer seg her i Florø er eit teikn på at oljebasen er attraktiv og trekkjer til seg operatørar.

– Kva betyr det for Florø-samfunnet?

– Det betyr veldig mykje. Statoil er den tunge aktøren på Fjord Base. No har vi GDF Suez, no har vi BG, og då håpar vi at vi greier å tiltrekkje oss tre, fire nye i løpet av dei neste åra. Det gir nye moglegheiter med eit lite cluster av aktørar som kan samarbeide om å drive kostnadseffektivt. Det trur eg er veldig positivt for miljøet her.

– Det viser at denne lokaliteten er attraktiv når det gjeld felta utanfor kysten vår, supplerer fylkesordførar Åshild Kjelsnes (Ap).