I dag tidleg kunne dei første bilane på fire dagar krysse fylkesgrensa til Hordaland på riksveg 13 over Vikafjellet.
– Entreprenøren ville vere sikker på at han fekk ned heile snøskavlen på første forsøk, så det gjekk med 50 kilo sprengstoff, fortel byggjeleiar Johann Njaastad hos Statens vegvesen.
Fjellovergangen vart natt til 26. mars stengd for 20. gang denne vinteren. Sidan har både snøskred og fare for nye snøskred frå den bratte fjellsida på nordsida av Skjelingavatnet halde vegen stengd.
På det meste har Vikafjellet vore stengt i seks samanhengande døgn denne vinteren.
– Etter skredet stod det att nokre skavlar i sleppområdet som vi ville ha ned. Søndag og måndag fekk vi ikkje gjort noko på grunn av uvêr, medan det tysdag var for dårleg sikt til å bruke sprengstoff, seier Njaastad.
Dermed gjekk salva av i dag tidleg.
– Sprenginga og ryddearbeidet gjekk som planlagt, så vi opna vegen klokka 09, seier Njaastad.