I finalen framførte Løvlid songen Kvilesteinen. Med 133 poeng tukta ho alle konkurrentane i vokalklasse A.
Ho har tidlegare vunne både B- og C-klassen. Difor hadde ho ikkje venta at å gå til topps i den øvste klassen skulle bli ei så sterk oppleving som det vart.
– Då det vart klart at eg hadde vunne byrja eg å storgrine, fortel ho.
- Les også:
Landskappleiken er det største arrangementet i folkemusikkverda og den eldste festivalen i Noreg. I år konkurrerte 1430 musikarar og dansarar i ei rekkje ulike kategoriar. I vokalklasse A hadde Løvlid elleve konkurrentar.
Løvlid har etter kvart vunne mange prisar. Denne rangerer ho som den gjævaste av dei alle.
– På Landskappleiken kan publikum omtrent like mykje som dei som står på scena. Det å få anerkjenning frå sin eigen folkemusikkfamilie, det er det største, seier ho.
– Fekk du feira noko?
– Ja, eg gjorde diverre det, så eg hadde ein litt dårleg dag dagen etterpå. Men det var veldig kjekt, seier Løvlid.
Livet som songar kan vere tøft og i periodar blir det mykje jobbing. På det verste går det så hardt ut over stemma at den kan forsvinne.
– Heile livet blir spegla i stemma. Så ein må passe på. Drikke mykje vatn og leggje seg tidleg når det er krise, seier ho.