– Det var heilt vilt! Vi stod berre og skreik, og vi var ganske høgt oppe alle saman, seier Eivind Nordvik Hauge.
Han var saman med systera og to kameratar då han påskeaftan fekk eit nært og spesielt møte med dei majestetiske dyra i Solheimsfjorden utanfor Florø.
– Ingen av oss har kome så nære på dei før, seier florøværingen.
– Nesten midt i flokken
Dei fire hadde vore på fisketur og var på veg attende til Florø då dei brått vart merksame på flokken som boltra seg i fjorden.
– Det var eine kameraten min som først fekk auge på dei, og då var vi nesten midt oppe i flokken, fortel Nordvik Hauge.
Flokken var på veg innover fjorden, og etter å ha snudd båten følgde dei fire etter. Nordvik Hauge seier dei heldt trygg avstand frå dei store dyra.
– På det næraste var vi vel 15 meter frå dei. Vi prøvde å halde oss på eine sida, men dei kom både bak oss og på sida, fortel Nordvik Hauge.
- LES OGSÅ:
- LES OGSÅ:
(Artikkelen held fram under biletet)
– Ein stor blodpøl
Sjølv har han sett spekkhoggarar frå land fleire gonger før, men å møte dei ute i fjorden med ein liten båt vart utan tvil eit sterkt minne for livet. Og endå meir fascinerande vart det då dei oppdaga at dei store dyra var på jakt.
Nordvik Hauge var fullt oppteken av å knipse bilete med kameraet då kameratane gjorde han merksam på kva som gjekk føre seg.
– Vi såg korleis spekkhoggarane hoppa etter nisene. Då vi køyrde bort etterpå såg vi ein stor blodpøl i sjøen.
– Vi kom fram til at det måtte vere nisene som dei hadde jaga og fått tak i.
Han seier dei såg fleire store flekkar med blod i sjøen.
– Det kan ikkje ha vore etter fiskestimar, seier han.
- LES OGSÅ:
- LES OGSÅ:
- LES OGSÅ:
(Artikkelen held fram under biletet)
Få får oppleve dette
Forskar Nils Øien ved Havforskningsinstituttet meiner venegjengen frå Florø har vore heldige når dei fekk oppleve spekkhoggarar på jakt.
Øien seier at spekkhoggarane som held seg i norske farevatn vanlegvis er kjent som fiskarar, men at det også finst spekkhoggarar som jaktar på andre dyr i havet.
– Ein deler gjerne spekkhoggarane inn i to hovudtypar. Den eine er den som hovudsakleg et fisk, og den andre er den som lever ut rovdyrpotensialet, der dei jaktar på andre sjøpattedyr og andre dyr i havet, seier Øien til NRK.no.
Spekkhoggarane som jaktar som rovdyr flyttar seg over store område, men det er ikkje mange rapportar som folk som observerer spekkhoggarar som jaktar på andre sjøpattedyr, fortel Øien.
– At dei går til angrep på niser er ikkje usannsynleg, men det er ikkje mange rapportar om dette, det kan eg love deg, seier Øien.
Håpar han får sjå dei igjen
Den ivrige fotografen Eivind Nordvik Hauge og venene har uansett fått seg ei sjeldan naturoppleving.
Nordvik Hauge seier dei aldri kjente seg utrygge, men seier spøkjefullt at systera var litt skeptisk.
– Det var heilt enormt! Vi har heilt i hundre i dagevis. Det var ei heilt vill oppleving!
– Trur du at du får oppleve dette igjen?
– Eg er såpass mykje på sjøen, så eg håpar eg ser dei igjen. No veit eg iallfall at eg alltid skal ha med meg kamera.