Turfølgjet stod heilt ved brekanten då israset kom

I helga fekk den tidlegare kardiologien ved Nordfjord sjukehus «flashback» til brebesøket då eit tysk ektepar i 30-åra omkom ved Nigardsbreen i Luster.

• LES OGSÅ: Tysk ektepar lèt etter seg to gutar

Også for seks år sidan kunne det gått frykteleg gale då Mikael Gustafsson vart vitne til fire som stod heilt oppe ved brekanten då is kom buldrande mot dei.

• LES OGSÅ: Her set mor og dotter seg i livsfare

– Dei måtte kaste seg ned bak ei klippe for å komme i skjul. Heldigvis fann dei ein stad der isen ikkje kunne nå dei. Hadde dei ikkje gjort det så kunne det blitt stygt, seier Mikael Gustafsson.

– Veldig dramatisk

Truleg sette den dramatiske hendinga ein kraftig støkk i turfølgjet. Det gav i alle fall Gustafsson ytterlegare respekt for både bre og naturkrefter. Sjølv tykte svensken og kameraten at sperringa kring 500 meter frå breen var for langt unna.

Kameraten ville heilt opp til brekanten, men Gustafsson var gjort merksam på farane som kan lure og dei to stogga kring 200 meter inne på avsperra område.

• LES OGSÅ: – Å stå framme ved brekanten er russisk rulett

– Plutseleg høyrde vi ei veldig buldring frå breen, og såg dei fire turistane. Det var veldig dramatisk, seier han.

Rasa i to minuttar

Til alt hell kom turistane ved brekanten seg i ly før isen hagla over dei. Gustafsson fekk filma deler av dramatikken.

(Artikkelen held fram under TV-saka)

– Vi lurte på om dei ville bli trefte, men heldigvis såg dei ut til å klare seg utan problem, seier han og held fram:

– Det heldt på i sikkert to minuttar, så det var veldig mykje is som kom ned frå brekanten, held Gustafsson fram.

Har fått respekt

Hendinga for seks år sidan har sett ein støkk i Gustafsson. I 2010 vart ein tysk turist alvorleg skadd framfor Briksdalsbreen.

– Eg vart veldig overraska over kor fort ting skjedde. Eg fekk veldig stor respekt for dette, seier han.

– Kva tenkjer du om folk som tek seg inn på avsperra område ved breane?

– Eg trur ikkje at dei forstår kva som kan skje og kor fort det går. Dei veit ikkje kor stor risikoen er. Det kan vere flott ver og alt ser heilt fint og stabilt ut, så kjem det eit stort ras.

Sikrar breen i Luster

Ved Nigardsbreen i Luster har politiet, kommunen og Statens Naturoppsyn i dag bestemt seg for å utvide sperringar og innføre vakthald.

Eit isområde på kring 100 kubikkmeter står i fare for å falle ned ved breen.

• LES OGSÅ: Lunkne til å gjere inn breen

– No er situasjonen ekstrem i dette spesifikke området. Vi kunne brukt politiloven og innført eit ferdselsforbod, men det ville vore eit enno større inngrep, seier lensmann Asle Karoliussen til NRK.no.

Betre informasjon

Gustafsson trur det kan vere ein god idé med både vakthald og betre informasjon for å skremme turistane frå å ta seg innanfor avsperra område.

– Informasjonen kan vere endå tydelegare. At ein kan skrive at det har vore dødsulukker, og at isen kan rase kan skje heilt utan forvarsel. Det kan også vere ein god idé å ha vakt gjennom turistsesongen, avsluttar han.