Ingen kampar dreg tilskodarar som når bergenslaget Brann kjem til bygda. Billettane går unna, og du må vere kjapp om du ynskjer deg sitteplass under vestlandsoppgjeret laurdag.
– Begge langsidene er utselde. På kortsida har vi eit par sitteplassar att, og ein del ståplassar, fortel Hilde Østbø i Sogndal Fotball.
Også mellom 500 og 700 bergensarar er venta å ta turen til Sogndal på laurdag. Østbø kryssar fingrane for at poenga blir att her i bygda.
– Eg håpar at vi tek tre poeng, det er jo viktig for oss. Men uansett håpar eg det blir god stemning på Fosshaugane.
Trur på Sogndal, heiar på Brann
Tribunane stod heller ikkje tomme under fotballaget si trening i dag. Nokre skodelystne hadde teke i bruk dei svarte klappsetene på tribunen.
– Det e no litt slapt med fotballtennis, men det får gå. Det er viktig å ta det litt roleg før kamp, kommenterer gutane.
Dei er sjølve fotballspelarar og elevar ved idrettslinja. I dag tok dei med matpakken ut for å sjå på korleis det ligg an med spelarane før laurdagens kamp.
– Eg trur det blir ein tøff kamp. Brann har hatt ein god sesong. Men eg trur Sogndal vinn, seier William Bjelland.
Han meiner det er viktig både for laget og bygda at dei får tre poeng.
– Vinn dei denne så kan dei vinne alle kampar. For bygda har det alt å seie, Brann er den største motstandaren vi møter, meiner Bjelland.
Sjølv om han har trua på Sogndal, stiller idrettseleven i raudt på kamp på laurdag.
– Eg har fått frå faren min at det er Brann som er laget. Han får ta på seg skulda for det, flirer han.
Tek imot gamlelaget
Ein vi kan vere sikre på stiller i svart og kvitt på laurdag, er Eirik Birkelund.
Midtbanespelaren frå Bergen kom til Sogndal i vår, og fortel at han gler seg til å ta imot gamleklubben på Fosshaugane.
– Det er alltid spesielt å møte eit lag ein har spelt lenge for. Det er litt ekstra. Det er
jo ein vanleg fotballkamp, førebur meg like godt til den som alle andre. Men at det er Brann legg ingen dempar på motivasjonen, seier Birkelund.
Det er ekstra stas å møte gamlelaget for fulle tribunar på Fosshaugane, fortel han.
– Det blir ein veldig gøy kamp, det blir fullt hus. Det er stort arrangement kring kampen her i bygda, seier Birkelund.