Mens store kommunar som Førde, Flora og Sogndal alle går tilbake, har Høyanger, som har slite i motvind sidan Fundo-konkursen i 2009, auka folketalet med 26 personar.
– Ei kjekk melding å få. Vi registrerer at fleire no søkjer seg heim att til både oppvekstsektoren og helse og omsorg, seier Høyanger-ordførar Petter Sortland (Ap).
Mykje av statistikken er derimot lite lystig lesnad.
- LES OGSÅ:
Einaste fylke i minus
For første gong på fleire år går det samla folketalet i Sogn og Fjordane tilbake på Statistisk sentralbyrå sin tabell for andre kvartal.
Ved utgangen av juni hadde 108.972 personar folkeregistrert adresse i fylket. Det er 70 færre enn ved årsskiftet, og Sogn og Fjordane er einaste fylke som går tilbake.
- LES OGSÅ:
(Artikkelen held fram under biletet.)
Sogndal mest tilbake
12 kommunar har nedgang i folketalet. Ikkje minst gjeld det dei store vekstsentera som dei siste åra har utgjort motvekta i ei eit fråflyttingstruga fylke.
Fylkets mest folkerike kommune, Førde, mista 23 innbyggjarar. Flora -15 og Vågsøy -19. Størst er likevel nedgangen i Sogndal som har mista 40 innbyggjarar på tre månader.
I Eid og Stryn auka derimot folketalet med høvesvis 10 og 22 nye innbyggjarar. Det er likevel mindre vekst enn i Høyanger. Ingen andre kommunar har betre utvikling enn industrikommunen i andre kvartal.
– Inspirerande, meiner ordførar Sortland som i tillegg til at fleire unge har flytta heim, forklarer deler av veksten med auka innvandring.
Trur pendlarar kan gi vekst
Etter å ha vore ein utprega innpendlar-kommune, der industrien har trekt til seg folk frå nabokommunane Balestrand og Gaular, trur Sortland Høyanger i framtida vil markere seg som eit godt alternativ for dei som pendlar ut til jobb.
– Vi ligg greitt til og er nær Førde. Vegane blir stadig betre, mellom anna ser vi at det blir jobba på E39 gjennom Gaular. No må vi intensivere jobben med å legge til rette for bustader og bustadbygging.
– Er jobben med å snu trenden etter Fundo-konkursen no gjort?
– Nei, på ingen måte. Jobben er på langt nær gjort. Vi har fått slike tal tidlegare også Folketala går opp og ned. Men det er svært gledeleg å sjå at vi også har fødselsoverskot. Det blir fødd fleire enn dei som døyr, seier ordføraren.
Folketal pr. 30. juni:
- Sogn og Fjordane 108.972 (-70)
- Solund 799 (-5)
- Gulen 2309 (4)
- Hyllestad (1393 (3)
- Høyanger 4199 (26)
- Balestrand 1314 (7)
- Vik 2680 (-8)
- Leikanger 2265 (3)
- Sogndal 7609 (-40)
- Luster 5079 (3)
- Aurland 1729 (15)
- Lærdal 2178 (-2)
- Årdal 5477 (-19)
- Fjaler 2839 (-7)
- Gaular 2942 (10)
- Førde 12.706 (-23)
- Askvoll 2992 (3)
- Jølster 3060 (-20)
- Naustdal 2792 (1)
- Flora 11.796 (-15)
- Bremanger 3912 (-20)
- Gloppen 5706 (-5)
- Stryn 7173 (22)
- Hornindal 1217 (3)
- Eid 5938 (10)
- Selje 2780 (3)
- Vågsøy 6088 (-19)
Kjelde: SSB.no