– Eg hadde vel kanskje min beste høgdekonkurranse nokon sinne i dag. Det er ein av dei få dagane då alt stemmer, seier vikjen Henrik Holmberg.
Med eit hopp på 2,06 meter under innandørs-NM i Bærum søndag, vann han gullmedaljen i tevlinga. Det er første gongen.
– Det vart ei perfekt konkurranse, og eg var meir stabil enn alle dei andre. Det var rett og slett utruleg gøy, seier Holmberg.
2,06 er same høgda som han hoppa førre helg under ei tevling i Ulsteinvik. Då sat han personleg rekord, og han hadde forhåpningar om at han skulle klare å gjenta suksessen i dag. Forma er nemleg heilt på topp.
– Eg er i den beste forma eg har vore i nokon gong, så eg gjekk for gull. Eg kan ikkje seie noko anna enn det.
Satsar på å ta fylkesrekorden i høgde
Rekorden for å hoppe høgt i Sogn og Fjordane er på 2,08 innandørs, og 2,10 utandørs. Den ambisiøse vikjen har planar om å ta begge rekordane innan året er omme.
– I år er det jo NM på Byrkjelo, så det hadde passa perfekt å ta utandørsrekorden på heimebane.- Eg føler at spensten er der, så det er eigentleg berre teknikken eg må terpe på for å hoppe så høgt, seier Holmberg.
Det var fleire utøvarar frå Sogn og Fjordane som markerte seg under innandørs-NM i Bærum i helga. Marius Vedvik frå Førde tok bronse i 3000 meter 8:13.84. Merete Helgheim frå Gloppen tok gull i 3000 meter kappgang med tida 13:42:22.