Helse Vest vil gå gjennom rutinar etter trippeldrapet

Helse Vest vil no gå gjennom rutinane på alle sine AMK sentralar. Det seier administrerande direktør i Helse Vest, Herlof Nilssen.

Bakgrunnen er TV-innslaget i Dagsrevyen torsdag om manglande trippelvarsling i samband med drapa på Valdresekspressen i Årdal i 2013.

Ei 19 år gammal jente og to menn i 50-åra vart drepne med kniv på Valdresekspressen. Ein asylsøkjar i 30-åra vart sikta for drapa. Mannen døydde 10. september i fjor etter å ha hoppa frå eit tak i fengselet.

• Les også: Tidslinje for trippeldrapet i Årdal
• Les også: «Noen har kapret bussen og drept mange»

Burde ha varsla umiddelbart

– Slik som dette var presentert på TV så såg det ikkje greitt ut. Vi burde nok ha varsla umiddelbart, seier Nilssen.

I same innslag opplyser DSB at det skjer feil ved trippelvarsling kvar einaste veke i Norge.

– Det er ein ny opplysning for meg. Viss det er rett, så er det klart at det er for mykje. Viss det har eit slikt omfang, kan vi ikkje leve med det. I kjølvatnet av dette må vi aksjonere for å sikre at dette kjem inn på annan måte, og at det vert sikra ein god, vidare varsling, seier Nilssen.

• Les også: AMK får kritikk av fylkeslegen etter sviktande trippelvarsling under alvorlege hendingar
• Les også: Helse Førde vedgår at de skulle ha varslet tidligere

Må sikre naudsynt opplæring

– Kva har ein lært av denne hendinga i Helse Vest?

– Vi har eit bilete av at AMK stort sett leverer svært godt. Dei er raske og profesjonelle. Men når vi heilt konkret ser at vi ikkje klarar å vidareføre varslinga, så er det uheldig. Ei slik hending er ei for mykje, seier Nilssen.

– Kva endringar ser du for deg?

– I første runde må vi vere sikre på at rutinane er i tråd med det som det skal vere. Så må vi sikre at vårt personell er kjent med rutinane, og at det vert gitt naudsynt opplæring slik at vi klarar å reagere når ulykka skjer, seier Nilssen.