Utviklinga av droneteknologien har eksplodert dei siste åra. Dronane er blitt både billegare og kraftigare, samstundes som det opnar for nye bruksområde.
Det er dette landets største helikopterselskap på fastlands-Norge – Airlift i Gaular – no tek konsekvensen av. Selskapet har no tilsett ein eigen prosjektleiar for den nye satsinga på drongeflyging. Han heiter Pål Anders Kårstad og har altså fått ansvaret for å leie satsinga på det, som ifølgje selskapet sjølv, vil endre heile helikopterbransjen.
– Det er særleg tre område der etterspurnaden etter dronar er stor. Det er ved inspeksjon av kraftlinjer og telemaster, inspeksjon på oljeplattformer og dokumentasjon av ras. Når det gjeld film- og tv-bransjen har den alt teke i bruk dronar.
– Vi har mange kundar i dag som spør etter dronar som eit alternativ til tradisjonelle helikopter, seier Kårstad.
– Vil ikkje utkonkurrere helikopter
Han jobbar no med å lage system for både utdanning av operatørar, drift og ikkje minst lage ein plan for korleis det skal satsast.
Kårstad legg ikkje skjul på at det kan vere store summar å spare på å bruke drone framfor helikopter. Ikkje minst fordi dronane er billegare å vedlikehalde. Han fryktar likevel ikkje for at det tradisjonsrike helikopterselskapet skal verte utkonkurrerte av den nye teknologien.
– Maskinene vi brukar i dag har mykje større løftekapasitet enn ei drone, enn så lenge. I tillegg vil det vere behov for folk i maskinene som kan ta avgjerder på meir krevjande oppdrag, forklarar Kårstad.
– Pengar å spare
Satsinga til Airlift vert teken godt imot hos Sunnfjord Energi som dag brukar mykje helikopter i arbeidet med å inspisere og halde vedlike kraftlinjer.
– Vi ser at dronar vil ta over fleire oppgåver i framtida. Dette er ei kjempespennande satsing. Eg trur at i løpet av dei næraste fem åra vil det skje store endringar, seier nettsjef Arild Fleten i Sunnfjord Energi.
– Har dette ei økonomisk side også?
– Ja, klart det. Det er det økonomiske aspektet som er mest interessant for oss. Både fordi det kan gå raskare å finne feil, men og fordi dronar kan gi oss billegare tenester på dei sakene der vi i dag utfører arbeid med eige mannskap eller der vi må leige inn helikopter.