Havnivået stig raskare

- Det kan få konsekvensar for ein del bygningar og vegar som ligg ned mot dagens havnivå.

Klimaforskar Atle Nesje trur kystkommunane i Sogn og Fjordane har store utfordringar i vente.

Ein fersk rapport syner at havnivået i fylket vil stige vel 70 centimeter i løpet av dei neste hundre åra.

- Havstiginga vil på sikt få konsekvensar for ein del kaianlegg, som rett og slett blir for låge, slik at ein må byggje dei høgare.

Forverring

Det er Bjerknessenteret som for første gong har laga ei norsk undersøking av havnivået langs kysten.

I Sogn og Fjordane vil havet stige 30 centimeter meir enn FNs klimapanel sine tidlegare prognosar.

Nesje meiner dette fører til at kommunane langs kysten bør ta konsekvensane.

- I alle fall når ein skal planlegge nye bygg, bør ein bokstaveleg tala ta høgde for desse havprognosane.

Må byggje 2,5 meter høgare

- Spesielt i stormflosituasjonar er det viktig at det er bygt høgare.

Kor mykje høgare bør ein byggje?

- I Sogn og Fjordane må ein for å vere heilt sikker opp i to og ein halv meter over normal vasstand.

Alvoret har sige inn

Klimaforskaren opplever det som at kommunane tek utfordringane kring auka vasstand på alvor.

- Eg har merka ein stor skilnad det siste halve året på at fleire og fleire kommunar tek kontakt med fagmiljøet når dei skal byggje ut. Nye anlegg vert konstruerte høgare enn ein tidlegare ville ha gjort.

HAVSTIGNING I ÅR 2100

Kjelde: Bjerknessenteret for klimaforskning.