Har utvikla nye miljøferjer i Førde

– Vi står midt i det grøne skiftet, og vi prøver å levere løysingar som er gode nok for den grøne framtida vi har i vente, seier Gjermund Johannessen, som er administrerande direktør i Multi Maritime.

• Les også: Batteriferja har trøbbel med straumen

Det er nordlandsreiarlaget Torghatten som skal nytte seg av ferja, og ho skal setjast på sjøen på Helgeland til våren neste år. Sjølve bygginga av ferja er det Fiskerstrand verft AS på Sunnmøre som skal stå for. Direktør i Torghatten Stein Andre Herigstad-Olsen seier i ei pressemelding at om ein samanliknar med vanlege dieselferjer, vil Co₂-utsleppa frå ferja vere 60 prosent lågare.

– Vi gjer dette på eige initiativ, det er ikkje noko krav ifrå myndigheitene, seier Herigstad-Olsen.

Johannessen i Multi Maritime er overtydd om at ferjenæringa lyt omstille seg og bli endå grønare i tida framover.

– Vi jobbar veldig mykje med å utvikle grøn teknologi, og med denne ferja har vi satsa på fleire fornybare energikjelder for å gjere utsleppa knytt til drifta lågast mogleg.

• Les Også: Vil ha fleire batteriferjer, men manglar pengane

Ferja vil også kunne koplast til landstraum for lading når ho ligg til kai, og kan veksle mellom biodrivstoff og elektrisk straum i løpet av ferjeturen. Det er verforholda og lengda på overfarten som vil avgjere kva hovudenergikjelde skal vere.

Multi Maritime er ein avleggar etter den gamle verksemda på Ankerløkken verft i Førde, og dei held på både med ferjer og andre sjøfartsøy.

– Vi er plassert midt mellom Stavanger og Ålesund, og soleis ligg vi svært sentralt plassert i kjernen av den maritime næringa i Noreg, seier Johannessen.