Denne veka har NRK avslørt at 27 motorsykkelklubbar i landet nyleg har blitt støtteklubb for Hells Angels. Blant desse klubbane er Hammer MC i Florø.
Dermed får den kriminellt belasta motorsykkelklubben endå meir feste i Norge.
- LES OGSÅ:
Vil ikkje snakke med NRK
Medlemmer som NRK har snakka med i Hammer MC nektar for at dei støttar Hells Angels. Men bilete som NRK har fått tak i til syner at medlemmer i Florø-klubben har «Support Club 81»-merket på brystet, noko som knyttar dei til det kriminelt belasta MC-miljøet.
Biletet har NRK henta frå ein open profil på Facebook. Etter at NRK avslørte dette har vedkommande stengt profilen sin.
Det er berre medlemmer i klubbar som formelt er tilknytta Hells Angels som får bære eit ruterforma merke med teksten «Support Club 81» på vestane sine.
81 betyr Hells Angels fordi den åttande bokstaven i alfabetet er «h» og den første bokstaven er «a». Det blir «HA» dersom ein set saman bokstavane, altså Hells Angels.
- Veit du noko om denne saka? Ta kontakt med NRKs journalistar simon.solheim@nrk.no eller erlend.blaalid.oldeide@nrk.no
Onsdag oppsøkte NRK hovudkvarteret til Hammer MC i Florø, men ingen ville snakke med oss. Vi har også ringt til sentrale medlemmer, men ingen vil la seg intervjue. Eit av medlemmane seier påstanden om at dei er støtteklubb til Hells Angels, er «vissvass.»
(Artikkelen held fram under biletet)
Medlemmer er straffedømde
Etter det NRK kjenner til har fleire Hammer MC-medlemmer 81-merket på skinnvesten sin. Kjelder vi har snakka med seier det er statuettar og plakatar med Hells Angels-logoar i klubblokalet.
NRK veit at medlemmer i Hammer MC er straffedømde for mellom anna narkotika- og valdskriminalitet.
Dei 27 nye støtteklubbane er etablert på kort tid i byar og tettstader over heile landet. Grunnen til dette er at Hells Angels har overtalt klubbar til å bli formelt tilnytta dei, ifølgje NRK Brennpunkt
Fann skytevåpen og narkotika
Hammer MC har vore i politiets søkjelys tidlegare: I 2003 gjennomførte politiet ein større razzia i klubblokala. Dei fann då narkotika, medikament, skytevåpen, og det dei mistenkte var smuglargods.
Stasjonssjef Robert Veseth ved Flora politistasjon seier han verken vil avkrefte eller bekrefte påstandane om at Hammer MC idag har tilknytning til eit organisert kriminelt nettverk.
– Eg ønskjer ikkje seie kva som er status. Politiet føl med på det som skjer, og vil meiner vi har ganske god kontroll på det som skjer i byen, seier Veseth.
Høyr radiosak her: