Leon Knapskog frå Eid har gjort meir i si kokkekarriere enn mange kan tore å drøyme om.
Han har mellom anna røynsle frå Restaurant Lucullus og Jacobs Bar & Kjøkken i Bergen. I tillegg har han jobba på Bouchon og The French Laundry i California i USA, begge med Michelin-stjerner. Han har også vore kjøkkensjef på den norske ambassaden i Paris.
Men no satsar han tungt på eit minibakeri i Eidsgata på Nordfjordeid. Og det til trass for at han ikkje ein gong er bakar.
- Les også:
Mykje nytt, men fiskelefsa blir verande
Kokken er i dag kjøkkensjef ved Balsnes gard. At han no får ein fot innanfor bakeriet var meir tilfeldig.
– Det har vore bakeri her sidan 1860, så det er utruleg trist viss det skulle vere slutt no. Det er moro å kunne vere med å drive det vidare, seier Knapskog.
Han peikar på at skilnadane mellom kokk og bakar er små.
– Det handlar om å lage eit godt produkt til kundane. Eg kjem ikkje til å vere her sjølv, eller slutte på garden på Balsnes gard. Men det er mine tankar og syn på ting som skal liggje i botn, seier Knapskog.
Men einskilde ting skal få vere slik som dei er i dag.
– Mange har spurt om vi kjem til å halde fram med fiskelefser, og det skal vi. Men eg kjem til å satse mykje på heimelaga brød, seier Knapskog.
GIR SEG: F.v. Leon Knapskog tek over styringa på minibakeriet etter Ståle Moheim, som har vore bakar i 40 år.
Foto: Harald Kolseth / NRKHeld fram i gamle-jobben
Påverknad frå det kontinentale kjøkken kjem det også til å bli meir av.
– Det blir mykje fransk og mykje surdeig. Vi skal vere kreative og ha det kjekt, kose oss på jobb, seier Knapskog.
Men han kjem ikkje til å slutte som kjøkkensjef ved Balsnes gard.
– Eg har full stilling der, så bakeriet vert noko som kjem i tillegg, seier Knapskog.
Ståle Moheim, som har styrt bakeriet til no, har vore bakar i 40 år. Han legg ikkje skjul på at det er eit krevjande yrke.
– Eg byrjar å kjenne det på kroppen, seier Moheim, som tykkjer det er kjekt at nye tek over.